Sugyot kang Col. Garma

Nakabantay ko nga adunay pipila ka lotto outlets sa Philippine Charity Sweepstakes Office (PCSO) sa dakbayan sa Sugbo nga gipangsirad-an.

Tingale, apil kini sa mga walay permit ug nalambigit sa illegal swertres operations.

Hinoon, daghan pa kaayo nga lotto outlets ug mga Small Town Lottery (STL) outlets nga nagkatap sa Dakbayan sa Sugbo nga wala gyud hilabti sa mga tinugyanan sa balaud, apil na ang kadagkuan sa PCSO nga tingali nakabenepisyo niining maong ilegal nga operasyon.

Ang kadagkuan sa PCSO mao gyud unta ang angay’ng mogukod niining daghang illegal outlets sa STL nga namaligya og mga numero sa lotto nga mas barato tuod og presyo ug dako kuno og debidindo ngadto sa mga makadaug.

Daghan kaayo kini sa Dakbayan sa Sugbo ug unta ang kadagkuan sa Office of the President magtagad usab niini kay ang PCSO ubos man sa ilang pagdumala. Nganong barato man ang baligya sa tiket sa lotto sa mga illegal outlets?

Ang tubag niini kay dili na man sila mopatong og buhis kay ang makolekta nila, diritso na man nga mosulod sa bulsa sa mga nagdumala sa illegal swertres/STL outlets.

* * *

Kaniadto, ang kapolisan duna gyuy Vice Control Section nga maoy gitugyanan sa pagpangronda sa mga ilegal nga sugalan.

Karon, ubos sa pagdumala ni Cebu City Police Office Director Royina Garma, ug bisan na sa mga nangaging hepe sa kapolisan, wala na ang maong police unit.

Tungod niini, walay matumbok nga responsable sa pagkuyanap pag-ayo sa ilegal nga mga sugal, sama sa illegal swertres, video karera ug molimoli.

Samtang ang uban niingon nga napuo na ang mga illegal gambling machines, apan ang akong mga informers sa Barangay Pasil, Suba, Ermita, Tejero ug ubang barangay, padayong nitaho nga nagpadayon ang maong mga sugalan sa ilang dapit.

Unya, kinsa man ang akong tuohan, ang mga polis? Motuo diay ko sa sulti ni Colonel Garma nga daghan kuno og mga dinakpan ang iyang mga sakop? Aw, mahimo tingale nga daghan ang nasakmit apan mga guba nga kahon aron ingnon nga nitrabaho sila batok sa ilegal nga sugal.

Hagiton nako si Colonel Garma nga human og sakmit sa imong mga sakop, dad-on dayon nato sa CCPO ug atubangan sa mga sakop sa media, atong paandaron sa pagmatuod nga nag-andar gyud ang maong mga gambling machines.

Dayon, diha mismo sa atubangan sa media, human sa pagsakmit sa mga gambling machines, atong panggub-on ang mga Central Processing Unit sa mga kahon.

Dili kay ang inyong pangkupogon mao lang ang mga video monitor.