Kinsa kaha gyud

Mora’g nagpa-thrilling gyud pag-ayo ang Bando Osmeña Pundok Kauswagan (BOPK) kon kinsa ang modagan pagka bise mayor sa ilang grupo. Mora’g tulo ang gipilian ni Mayor Tomas Osmeña.

Sila mao si Konsehal Dave Tumulak, Konsehal Mary Ann De Los Santos ug Konsehal Franklyn Ong nga naglingkod isip ex-officio member sa Cebu City Council nga nagrepresentar sa mga opisyal sa barangay.

Apan nakadungog ko nga mora’g nawala na sa lista si Konsehal Tumulak, ug ang gipilian karon, mao na lang sila si Konsehal De Los Santos ug Konsehal Ong.

Pero kon ako si Mary Ann, dili na lang ko modagan pagka bise mayor kay dili ikalimod nga lig-on gyud ang iyang ikaatbang nga si kanhi mayor Michael Rama. Bisan tuod og dili na mayor si Rama, apan daghan gihapon kini og dumadapig.

Karon nga si Mary Ann alyado na sa BOPK, dako na kaayo ang iyang kahigayonan nga modaog kon magpapili pag-usab.

Si Franklyn Ong, kon modagan siya, dako gyud nga sakripisyo kay kinahanglang mosuroy siya sa 80 ka barangay aron mangampanya.

Apan nindot ang sitwasyon ni Franklyn kay pananglit mapilde siya ni Rama, walay mawala kaniya kay magpabilin man siya nga kapitan sa barangay ug presidente sa Association of Barangay Councils (ABC) ug sakop sa konseho.

Ang sitwasyon ni Tumulak, susama ra kang Mary Ann. Apan dili maayong pugngan kon gusto gyud sila nga molansar og mas taas pa nga katungdanan sa kagamhanan kay basin og gusto nila nga makahatag og mas taas pa nga pagpangalagad.

* * *

Usa ka higala nakong polis nga anaa madestino sa Carbon Police Station mitug-an kanako nga daghan pa gyud nga mga illegal gambling machines diha sa ilang teritoryo.

Nakamatikod ang amigo ko nga polis nga ang iyang mga kauban mora’g walay gana nga mosakmit niining maong mga video karera ug moli-moli.

Nakapaduda kini kaniya nga ang uban niyang mga kauban nagdawatan og payola gikan sa mga gambling operators.

Ingon man usab niini ang sitwasyon diha sa Barangay Pasil ug Barangay Suba kay nagpadayon man pag-operate ang mga illegal gambling machines.

Ang nakapait gyud kay ang informer nako sa Barangay Pasil ug Suba, mitug-an nga dunay ilang mga opisyal sa barangay nga maoy nag-operate og mga gambling machines.

Mora’g motuo ko niini kay kon ang mga opisyal dili mosugot nga may ilegal nga sugal nga maka-operate sa ilang lugar, wala gyuy maka-operate nga video karera, moli-moli ug illegal swertres.

Unsaon nga ang ubang opisyal sa Cebu City Police Office (CCPO) kiyugpos man sab ug wala mohimo’g operations.

Hagit kini ni Senior Supt. Royina Garma nga pamatud-an nga wala sila magdawatan og payola sa mga illegal gambling operators.