Si Palma ug duha ka heneral

Dihang nisuway sa kadagkoan sa Dakbayan sa Sugbo ug Commission on Human Rights (CHR) pagpatabang ni Cebu Archbishop Jose Palma alang sa seguridad sa duha ka nakalingkawas sa pagpamusil sa Malubog, gipaandam sila sa posibleng pagkabawo. Nabalaka sila nga mobalibad si Palma sa pagsukwahi sa kapolisan.

Sa ilang kakugang, gihangop ni Palma ang ilang hangyo. Gipaandam dayon ang mga lawak sa Archbishop’s Palace alang sa duha ka biktima.

Naikog na hinuon ang taga City Hall ug CHR kay di pa diay makagawas dayon ang duha gikan sa Cebu City Medical Center (CCMC).

* * *

Mapasaylo ang mga wa kaila ni Palma nga magduda sa kalig-on sa iyang baruganan. Kay ang iyang mga baruganan di sama kakusganon ug ang iyang mga sinultihan di sama kamabulukon sa ubang nituki sa mga kontrobersiya sa Simbahang Katoliko.

Apan di angay’ng masayop si Chief Superintendent Debold Sinas, hepe sa Police Regional Office sa Central Visayas, sa pagsalikway sa gihimo ni Palma, sama sa iyang ka way tahod sa ubang nisukwahi niya.

Kay kapin na sa dekada ang nilabay, si Palma nibarug sab batok sa mas gikaintapan nga heneral.

* * *

Niadtong 2005, samtang Obispo pa sa Calbayog sa Samar, si Palma nisaway sa pagpangyatak sa militar sa tawhanong mga katungod.

Sa iyang pastoral letter, giawhag ni Palma si kanhi Presidente Gloria Macapagal-Arroyo paghunong sa di tawhanong kampanya sa militar sa Eastern Visayas.

Gipasanginlan ni Palma si Maj. Gen. Jovito Palparan sa 8th Infantry Division nga responsable sa pagpatay, pagdagit ug pagkawagtang sa human rights advocates sa Samar.

Nitanyag siya og pagkaon, tambal, sinina ug pinuy-anan alang sa mga bakwit sa bangis nga mga operasyon ni Palparan.

* * *

Niadtong 2009, dihang Arsobispo sa Palo, Leyte ug usa ka tuig sa wa pa matudlo sa Artsidyosisis sa Sugbo, si Palma nisupak sa pagtudlo ni Arroyo kang Palparan sa Dangerous Drug Board (DDB).

Matud niya inay hatagan og posisyon angay’ng patubagon si Palparan sa extrajudicial killings (EJKs).

Hinaot nga si Sinas makahigayon sa pagpamalandong.

Mahimong way makahikap niya karon tungod sa labihang kahawod, sama ni Palparan sa kinapungkayan sa iyang gahom.

Apan moabot rang adlaw sa panudya. Nga nahiagoman nang Palparan sa iyang pagtingkagol karon sa New Bilibid Prison (NBP).

* * *

[email protected]