Gikan sa kahiladman

Kini ang singgit sa mga kaigsuonan nga nahimong mga biktima sa mga saag ug tinuyong bala sa kaligutgot ug kasilag.

Way laing nahimo ang sama kanato gawas lamang sa paglitok sa mga pulong sa pag-ampo sa panghinaut nga mahunong na kining tanan.

Apan unsaon man paghunong niini kon daghan gihapon sa kaigsuonan ang motaak sa dalan sa kalaglagan? Ilang gilaglag ang ilang kaugalingon ug ilang laglagon ang uban? Ang kaangayan nga gipangita padayong mamahimong idlas kon ang matag usa di maantigong mobiya sa bisan unsang giisip nga personal ug kon atong pundok ang tanang personal kini mamahimong nakasentro lamang sa kwarta nga bisan gani ang mga nagtuong mga balaan ang mahimong masilaw ug mahaylo sa bakak nga atong gipahid sa bakakong yawa.

Saksak Sinagol

Ni Lucky Malicay

Kinsay nagpaluyo pagluthang?

Usa sa labing dugoon nga adlaw sa lalawigan sa Sugbo mao kadtong nakalabay nga Huwebes sa dihang 15 ka tawo ang patay. Ang hinungdan sa kamatayon sa kadaghanan kanila naggumikan sa negosyo sa illegal nga druga.

Pulos sila mingbay-ad atol sa lapad nga operasyon sa kapolisan batok sa ilegal nga binuhatan, ilabina sa druga. Hinuon gabii pa lamang sa Miyerkules, nagsugod na og aso ang buka sa mga armas sa kapolisan sa ilang pag-raid niadtong mga kriminal.

Apan sa maong mga namatay, dakong kontrobersiya kadtong lima nga giluthang sulod sa usa ka van didto sa bukirang barangay sa Malubog sa siyudad sa Sugbo. Nganong kontrobersiya man? Kini tungod kay mismo ang kapolisan maoy gitumbok nga mga suspetsado.

Aduna kunoy mga witness kinsa mipunting sa kapolisan nga maoy mironda sa mga biktima ug ilang gipasakay sa van ug ilang gidala sa bukid ug didto ilang gihuwes de kutsilyo. Gani usa sa mga witness apil kuno sa mga gisignit sa otoridad apan suwerte nga nakaikyas.

Hinuon abtik nga nakapanghimakak ang kapolisan sa maong alegasyon. Matud pa sa liderato sa Police Regional Office-7, unay sa negosyo sa druga kadtong maong insidente. Ilang pasabot mao nga adunay double cross nga nahitabo sulod sa maong sindikato.

Ambot kon kinsay nagsulti sa tinuod sa maong insidente. Ang duha ka giingong witness ba o ang kapolisan. Hinuon dili ikatingala kon mosulod na unya ang National Bureau of Investigation nga maoy mosusi sa insidente.

Dili usab nato ikatingala nga ang kapolisan mao na usab ang mahan-ukan nga mao ang nagpaluyo sa maong insidente. Notoryos na ang kapolisan sa mga alegasyon sa extrajudicial killings niining gihingusgan nga gubat batok sa druga sa administrasyon ni Rodrigo Duterte.

Tungod sa maong alegasyon, dakong problema karon sa kapolisan ang pagpanagang, nga wala silay kalabotan sa maong panghitabo. Hinuon dili usab kita angay nga makahukom nga sila na ang nagpaluyo niadto. Mga ebidensiya ray maka-decide niana.