EDITORYAL - Katawhan batok kurapsyon

Adunay 50 hangtud 80 ka mga opisyales sa gobiyerno ang gipaubos karon sa imbestigasyon tungod sa kurapsyon, matud pa sa balita kagahapon.

Kaning maong kurapsyon nahitabo sa mismong administrasyon ni Pres. Duterte nga nagpasabot siya mismo may pagtugot o basin siya pa mismo ang mipili kanila nga mabutang sa pwesto.

Ang presidente daan nang mibahad nga iyang gukdon ang mga kurakot sa gobiyerno sugod pa lang sa iyang paglingkod sa pwesto. Ang kurapsyon maoy hinungdan kon nganong napalpak ang daghang mga programa ug mga proyekto sa gobiyerno alang sa pagpalambo unta sa kinabuhi sa mga Pilipino.

Ang mga opisyales sa gobiyerno nga naanad na sa maong hiwi nga trabaho mao usab ang naglawog niining mga pribadong mga korporasyon aron manuhol sa mga opisyal aron makakuha og pabor.

Natural lamang sa mga pribadong korporasyon nga mamawi sa ilang nahatag nga ‘komisyon’ ug mga ‘padangog’ para sa mga opisyales kay ilaha man kining kwarta. Ang resulta, daghang mga nangapalpak ug wala mapahimusling mga imprastraktura o mga programa nga alang unta sa mga kabus.

Samtang kadtong mga kurakot nga opisyales nagpabaga sa ilang nawong ug nagpaburot sa ilang mga bulsa. Si Special Assistant to the President Christopher “Bong” Go kansang opisina milihok kauban sa Presidential Anti-Corruption Commission (PACC) paggukod niining mga kurakot nga opisyales, nanawagan sa  katawhan nga tabangan ang gobiyerno pagbantay batok niining mga abusadong opisyales.

Apan kinsa man gud di mahadlok nga ang opisyales nga naghimo og milagro sa mga transaksyon sa gobiyerno tinudlo man sa presidente.

Husto kining iyang sugyot nga kinahanglang hatagan og igong proteksyon ang mga yanong tawo nga gustong motestigo batok sa mga kawatang opisyal.

Sumala pa nga ang tawong bisan nakahibalong sayop apan padayong motuo, mosalig, moabiba, ug dili mosupak sa hiwi nga binuhatan sa ilang opisyales gitawag sila nga mga “istupido.” Ang nakaparat sila kadtong pirmeng mabiktima sa kurapsyon.