Gihulga nga ikiha og bigamy sa unang asawa

Dear Atty. Divine:

Naminyo ko pag year 2005 ug duna mi duha ka anak. Usa ka OFW ang akong bana ug once a year lang siya mopauli. Karong bag-o usa ka babaye ang miadto sa among barangay ug nipasaka og reklamo batok kanako ug sa akong bana tungod kay minyo daw sila sa akong bana niadtong 1995 ug duna daw silay tulo ka anak. Wa ko kahibawo nga minyo diay ang akong bana ug wa sab siya mosulti nako. Atol sa among pag-atubang sa barangay miingon ang babaye nga  iya ming ikiha og kasong bigamy ug iya ming ipapriso. Nakuyawan ko attorney kay kon tinuod nga minyo ang akong bana basin og mapriso gyud mi ug unsaon na lang ang among mga anak. Wa pa kahibawo niini ang akong bana kay atoa pa siya sa gawas. Unsay angayan nako nga buhaton? Daghang salamat. — Gina

* * *

Dear Gina,

Kon tinuod nga kaduha nagpakasal ang imong bana ug ikaw ang iyang ikaduha nga asawa, mamahimo gyud siya nga mapasakaan og kasong bigamy basi sa Article 349 sa atong Revised Penal Code tungod sa iyang pagminyo pag-usab bisan  kon nag-exist pa ang iyang previous marriage. Hayan maapil sab ikaw sa pagkiha niini apan tungod  kay wa kay kasayuran nga minyo na diay daan ang imong bana sa dihang  siya nagpakasal kanimo then mamahimo mo kining magamit nga depensa.  Base sa desisyon sa Korte Suprema  kini nagkanayon nga sa kasong bigamy dili sa tanang higayon nga ang magtiayon masilotan tungod sa ilang pagminyo bisan kon nag-exist pa ang previous marriage tungod sa posibilidad nga ang una ug ikaduhang asawa pulos sab sila biktima. Ang maayo nimong buhaton karon mao ang pagpahibawo sa imong bana nga mipasaka og reklamo ang iyang unang asawa ug angay niya kining estoryahon aron di moabot sa korte ang kaso. Thanks and God bless. — Atty. Divine

* * *

Alang sa inyong pangutana, ipadala lang sa Legal Corner sa Banat News sa V. Gullas St., Cebu City or email sa [email protected] og akong tubagon ang inyong pangutana pinaagi sa akong column matag Miyerkules, Sabado og Domingo.