Ilha gyud ang mga kandidato

Sagad sa mga mo-file og certificate of candidacy, adto gyud sila mohimo niini kon duol na ang deadline. Sa ato pa, kapin sa duha ka semana gikan karon, masayod na kita kon kinsa ang mga kandidato nga managan sa tagsatagsa nato ka dapit.

Kinahanglang hashasan gyud nato sila pag-ayo, aron nga dili kita magpataka lang sa pagbotar, ug ang mabotohan nato mao kadtong maayo lang sa pasalig. Kining maong batasan, daghan kaayo kini karon sa mga gustong magpapili.

Ang una gyud ninyong bantayan mao kadtong mga tawo nga mokalit lang pag-abot sa inyong mga lugar kon duol na ang eleksiyon, ug magsuroy-suroy dayon ug mopahibalo nga gusto sila nga mahimong mga opisyal sa kagamhanan.

Pastilan, dili gyud intawon kita magpadala sa mga artipisyal nga pahiyom niining mga tawhana nga nagsugod na pagsuroy sa inyong mga lugar.

Kon kining mga tawhana kusog kaayong mopahiyom karon, ambot og mopahiyom pa ba kana kon makadaog.

Apan nindot nga dunay mga tawo nga gustong moserbisyo sa kagamhanan, apan kana kon tininuod lagi.  Bilib ko ni Kongresista Raul del Mar kay malipay gyud siya nga dunay mga tawo nga moatbang kaniya pagdagan aron nga may kapilian ang mga botante.

Pero, tan-aw nako, wala pa matawo ang makapilde ni Del Mar tungod sa daghan niyang nahimo.

Bilib pa gyud ko kay dili gyud mangdaot sa iyang kontra, ang iya kampanya ra gyud nga pasabton ang mga tawo nga gusto pa siyang mopadayon pagserbisyo.

* * *

Bahin sa panagsangka nila ni Mayor Tomas Osmeña ug Vice Mayor Edgardo Labella, pulos sila lig-on nga kandidato.

Nakabentaha gyud hinuon si Osmeña kay siya man maoy anaa sa gahom, ug maisip man nga challenger si Labella.

Ang nakabentaha kang Labella kay dali kaayo nga mopahiyom, mao nga si Osmeña kinahanglan nga magkat-on na nga mopahiyom sa katawhan nga iyang ikasugat.

Ako hinuon nasayod na sa batasan niining Osmeña nga dili gyud ni kaayo siya mopahiyom kanunay, mao nga ingnon nga estrikto.

Tan-aw nako, mora’g pareho mi si Tommy nga dili kaayo mopahiyom, apan mga maayong tawo.

Mao man gani kini ang rason nga daghan ang moingon nga estrikto kuno ko nga pagkatawo, apan wala lang sila makaila ug masayod sa tinuod nako nga batasan.

Apan may tambag lang ko ni Mayor Osmeña nga kay hapit na man ang eleksiyon, magpa-interview na gyud siya og balik sa mga reporters.