Drug test ni Rama

Sa makausa pa, mipailalum si kanhi mayor Michael Rama niining Dakbayan sa Sugbo sa drug test isip kabahin sa iyang lakang nga makalingkawas kini gikan sa alegasyon nga nalambigit kuno kini sa ilegal nga druga.

Mipasigarbo si Rama ug iyang mga supporters sa ilang urine sample atol sa maong drug test atol usab sa ilang pagduaw sa buhatan ni Chief Superintendent Debold Sinas, ang director sa Police Regional Office-7.

Matud pa nga ang iyang pagpaubos sa drug screening kabahin kini sa iyang paningkamot nga makalingkawas na katapusan sa gipas-an niini nga dakong akusasyon sa druga gikan mismo ni Presidente Rodrigo Duterte.

Hapit na ang eleksiyon ug grabe ang paningkamot karon ni Rama nga malimpiyohan na gayud ang iyang ngalan. Siguro gusto siya nga mosang-at sa iyang kandidatura nga libre na gikan sa maong alegasyon.

Apan walay laing nga makalimpiyo sa ngalan ni Rama kondili mismong si Duterte lamang. Kini tungod kay ang presidente man ang nag-anunsiyo sa iyang ngalan nga usa kuno sa mga lokal nga opisyal nga nalambigit sa druga.

Ug angay lamang nga maningkamot si Rama nga makakuha og higayon nga makauban si Duterte aron nga iyang ma-explain ang iyang bahin, nga makaestorya siya sa presidente nga dili tinuod ang maong mga alegasyon batok kaniya.

Kay kon dili gikan mismo ni Duterte ang paglimpiyo kaniya gikan sa maong akusasyon, nan pabilin gayud ang yugo sa alegasyon sa druga nga nagpatong sa iyang liog. Ug dili gayud kini matangtang.

Dako nga sagabal kining maong alegasyon sa kandidatura ni Rama.

Dili niya ikalimod nga moepekto kini inig iphanay na unya sa mga boto.

Mao na nga kinahanglan gayud nga samtang aduna pay higayon ang kanhi mayor, angay gayud nga makasikoy siya og panahon uban sa presidente.

Dili gayud makatabang ang pagpailaum ni Rama sa drug test.  Bisan pa kon kapila pa siya magnegatibo, dili gayud mawala ang mantsa sa alegasyon sa druga nga gihilam-os ni Duterte ngadto kaniya.

Hinuon, agta ray nasayod kon kanus-a gayud malimpiyohan ang ngalan ni Rama gikan sa maong alegasyon sa druga.