EDITORYAL - Kinaiyang Pilipino

Sama sa mga nangaging mga katuigan panahon sa pagparehistro sa mga tawo aron makabotar, wala gihapon mawala kining “eleventh-hour” nga kinaiya sa mga Pilipino.

Kagahapong adlawa mao ang kataposang adlaw sa pagparehistro apan para lang sa mga overseas Filipino workers kay niadto pang Sabado kutob sa alas-3 sa hapon ang cut-off sa mga lokal nga buot magparehistro.

Ang pagparehistro gisugdan niadtong Hulyo 2 ug gitapos niadtong adlaw nga Sabado. Kini alang sa umaabot nga mid-term election sa sunod tuig.

Gikan Hulyo 2 ning tuiga hangtud sa sunod nga mga adlaw wala kaayo nagpanon ang mga buot magparehistro. Tungod ba kaha kay busy sila o wala masayod ang uban nga sugod na ang pagparehistro.

Wa man hinuon magkulang ang Commission on Elections pagpahibalo sa katawhan bahin niini, apan daw wala gihapon kaayo kini makaabot sa kadaghanan sa sayong bahin pa lang sa gitakdang adlaw sa rehistrasyon.

Kini tungod kay makita nga niadtong Sabado nagdasok gyud ang mga tawo sa nagkadaiyang election offices hasta sa mga satellite registration offices nga gituyo og butang aron mas daghan ang makaparehistro.

Dili na gyud tingali mausab pa kining kinaiya sa mga Pilipino nga ayha lang magkarakara kon deadline na. Ang resulta, daghan ang nagbagulbol kay nisamot sila kalangay pagproseso.

Kinsa may dili malangan nga pag-abot didto sa kataposang adlaw taas naman kaayo ang linya. Niadtong mga gusto gyung marehistro napugos sa pag-agwanta sa kataas sa linya hangtud nga mahuman.

Dili man unta kini mahitabo kon sa sayong bahin pa lang sa pagsugod sa pagparehistro nagtagad na silang daan niini.  Karon ang uban kutob na lang pagbagutbot sa ilang baba kay aduna may wala gyud makaparehistro gumikan kay naabtan sa cut-off time ug aduna pa silay laing ‘importanteng’ lakaw.

Ang pait duna gyuy uban nga namasangil sa Comelec nga walay klarong sistema ug proseso o di kamao mo-organisar aron mas mapaspas ang pagparehistro. Kanus-a kaha maputol kining kinaiyaha?