Nagdumili pag-repair sa apartment ang tag-iya

Dear Atty. Divine:

Nag-rent ko og apartment sukad niadtong Hunyo kay nagpaduol ko sa school sa mga bata. Hangtud sa Abril ang term sa akong pag-abang.

Apan karong bag-o sa dihang mibunok ang kusog nga uwan kalit nga mitulo ang kisame sa among kwarto ug nangabasa ang uban namong butang lakip na ang mga sinina.

Amo nang gisultian ang Lessor niini ug among gihangyo sa pagpa-repair  sa labing madaling panahon ilabi na kay panahon na sa ting-uwan  apan kanunay lang mi nga gisaaran ug giingnan ko sa tag-iya nga kay nagdali man daw ko, dapat ako nalang ang mopa-repair. Akong gitan-aw ang among Contract of Lease wa man maghisgot nga ang nag-abang ang mopa-repair kon dunay guba sa apartment.

Ang akong pangutana, makapugos ba mi sa Lessor sa pag-repair sa apartment?

Kon di gihapon niya lihukon, unsa may lain nako nga option? Daghang salamat. —Liezel

* * *

Dear Liezel:

Base sa  Art. 1654 (2)  sa atong balaod kini  naglatid nga ang lessor obligado nga mo-repair sa iyang gipaabangan nga pinuy-anan aron kini magpabilin nga luwas puy-an, gawas lang kon dunay kasabutan ang matag habig nga  ang nag-abang ang mo-maintain ug mo-repair sa iyang giabangan nga apartment.

Sa imo nga kaso, wa mabutang sa inyong kontrata nga ikaw isip nag-abang ang mo-repair busa ang nalatid sa balaod nga ang lessor ang mo- maintain ug mo-repair maoy mo-apply.

Kon mapakyas  gyud ang Lessor sa pag-repair bisan pa kon imo na kining gihatagan og igong panahon, aduna kay option sa pag-suspend sa imong pagbayad sa abang  ngadto kaniya base sa  Art. 1658 sa atong balaod hangtud nga iyang i-repair ang apartment.

Lain nimong opsyon mao ang pagputol sa inyong kontrata  kon padayong mobalewala ang owner sa pag-repair.  Thanks and God bless. — Atty. Divine

* * *

Alang sa inyong pangutana, ipadala lang sa Legal Corner sa Banat News sa V. Gullas St., Cebu City or email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.