Sira sa operasyon

Dili lamang sa Dakbayan sa Naga, adunay daghan pa nga mga quarry sites ang nag-operate sa lalawigan sa Sugbo. Ug daghan usab kanila ang nag-operate nga kulang sa monitoring sa mga hingtungdang ahensiya sa kagamhanan.    

Ilabina kadtong illegal nga mga quarry sites. Tungod lagi kay wala silay igong permit pag-operate, dili sila ma-monitor sa gobiyerno, ilabina sa Department of Environment and Natural Resources.

Delikado kaayo ang ilang operasyon tungod kay basin kon mao na usab kini ang hinungdan sa lain na usab nga trahedya. 

Kinahanglan nga dili na gayud mausab ang insidente sa halapad nga pagdahili sa yuta didto sa Naga sa niaging semana.

Maayo na lamang kay human sa maong panghitabo, gipahunong ni Gobernador Hilario Davide III ang mga pag-quarry dinhi sa lalawigan. Kini nunot usab sa order ni DENR Secretary Roy Cimatu paghunong sa tanang quarry operations sa nasud.

Hinaut nga daghan ang misanong niining maong mga kamandoan dili lamang sa probinsiya sa Sugbo kondili sa tibuok nasud. Dili na kita makapaabot pa nga adunay mahitabo nga laing landslide nga mokutlo og daghan na usab nga kinabuhi.

Apan unsa ba ang kasigurohan nga wala nay nag- quarry sa probinsiya nunot sa order sa gobernador?

Hinuon dili gayud kita makapaabot nga mosanong sa order kining mga tag-iya sa ilegal nga mga operasyon sa mina ug quarry sa lalawigan. Ug angay lamang sila nga gukdon sa kagamhanan ug sirad-an ang ilang operasyon.

Ang gikinahanglan mao ang hugot nga monitoring sa mga quarry operations sa lalawigan.

Basin baya kon igo lamang sa pagmando ang Kapitolyo ug nga kulang kini sa ngipon paggukod niadtong wala nituman niini.

Angay usab nga mangusog ang mga local government units niini. Tungod kay sila man ang mas nahibalo sa mga quarry operations sa ilang lugar.