Gisupak na pud ang BRT

Bisan kon ready na ang pag-implement sa BRT, it seems nga sa mga misupak niini,  nagpadayon ang ilang mga paningkamot pagbabag niini kay lagi dili sila ganahan ni Mayor Tomas Osmeña.

Pastilan, ngano man ni? Dili ba sila makahuwat sa sunod tuig nga eleksyon, aron ilang pildehon si Tomas, ug aron dili na mapatuman ang iyang mga proyekto?

In the meantime, ato lang unang sustenihan ug suportahan ang iyang pagka-mayor isip pinili sa lungsod. Meaning ipadaplin lang una nato ang politika alang sa kaayohan natong tanan.

After all, bisan kon di sila ganahan ni Tomas, lakip man unya sila sa mabulahan ug maka-benefit sa mga proyekto sa incumbent mayor. Huwat lang inig-abot sa inyo unyang panahon kon kamo na ang magtungkaro sa city hall.

Aron dili maklaro ang padayon nilang pagsupak sa BRT, ila lang giingon nga usbon ang alignment niini. Ila pa kunong i-validate ang unang mga proposal sa proyekto, kon relevant pa ba kini karon, “considering the substantial change in the landscape of Metro Cebu.”

Unsa man ning nausab nga landscape sa Sugbo nga maoy makapa-stay or stall sa BRT?

Maghimo na usab og laing feasibility study kay ila kunong i-integrate ang BRT ngadto sa IITS kon Integrated Inter-Modal Transport System sa Metro Cebu.

Ang IITS naglangkob sa mga dagkong proyekto sama sa Skytrain, point-to-point bus, light rail transit, ug Greenways, nga adunay mga bike lanes, sidewalks ug cross walks.

Apan kining maong mga proyekto magpabiling damgo tingali sulod sa lima ngadto sa napulo ka tuig.

Sa ato pa, maghuwat ang BRT kay lagi, mahimo na man kining component sa IITS. Pila kaha ka tuig ang paghimo lang sa mga feasibility studies sa ginganlan nilang mga proyekto?

Ila kunong isulod ang BRT sa “baskets of solutions” pagsulbad sa suliran sa trapiko sa Metro Cebu.

Nindot.  Apan, samtang magpadayon kita pagdamgo, hunongon lang una nato ang pag-implement sa BRT?

Di ba mahimo nga atong i-segregate si Tomas from the BRT project ug maoy atong ipatigbabaw ang kaayohan sa mga Sugboanon ug sa Sugbo mismo? Lisud ba gud ning buhaton?

Sa ako nang giingon, huwat na lang ta sa 2019 elections (hapit na man) ug atong pildehon si Tomas. Ug … welcome Mayor Ed Labella!

Si City Administrator Nigel Paul Villarete nagkanayon: “Somebody who wishes to change alignments probably hates the project so much they want to stop it again.” Pastilan!