Tumulak mobali?

Makapatingkag sa dunggan ang report nga nanggawas sa social media nga kuno si kanhi mayor Michael Rama mao na ang kandidato sa Barug-PDP pagka kongresista sa Cebu City South District, ug dili na pagka bise mayor.

Labaw pa nga misiga ang akong mga mata pagkakita nga ang kandidato kuno sa Barug-PDP pagka bise mayor mao si Konsehal Dave Tumulak! Pagka karon gud, si Tumulak alyado man ni Mayor Tomas Osmeña.

Apan matud nila ni Rama ug Tumulak nga intriga lang ang maong report. Ang Bando Osmeña Pundok-Kauswagan (BOPK) kuno mopadagan ni Konsehal Mary Ann delos Santos isip bise mayor ni Osmeña ug maoy rason nga si Tumulak adto na lang mopasilong sa Barug-PDP.

Samtang wala angkona sa duha ka politikanhong grupo nga tinuod ang report nga gipublikar sa social media, apan ang ubang ngalan nga naapil niini, tinuod man.

Sama ni Atty. Marie Velle Abella, hepe sa personnel department sa Cebu City Hall, miangkon nga tinuod ang report nga usa siya sa gikonsiderar sa BOPK nga padaganon pagka konsehal sa south district.

Kon tinuod man ang lista sa mga kandidato sa BOPK, kuhaon sa pundok isip kandidato ang mga kapitan sa mga dagkong barangay dinhi sa dakbayan.

Si Atty. Abella dili kapitan, apan siya posible nga kuhaon kay aron ang BOPK dunay representante sa dako kaayo nga Abella Clan sa Barangay Labangon.

* * *

Mahulagway gyud nga nagkuwang sa ilang pagpangalagad ang kadagkoan sa DENR, PENRO ug ang mga opisyal sa lainlaing kalungsuran dinhi sa Sugbo kay napakyas man sila sa pagpahunong sa daghang illegal quarry operations nga makahatag lang og katalagman.

Ambot nganong gipasagdan ra man sa mga opisyal sa kagamhanan kining mga illegal quarry diha sa ilang tagsatagsa ka dapit.

Apil sa mga wala magtagad sa illegal quarry operations mao ang mga opisyal dinhi sa dakbayan sa Sugbo. Nakahinumdom ko nga si Konsehal Alvin Arcilla nga kaalyado ni Mayor Tomas Osmeña maoy gitahasan nga mangulo sa Local Mining and Regulatory Board aron motan-aw sa mga illegal quarry operations.

Mao nga nahibulong ko kay daghan man gihapon ang mga illegal quarry karon.

Nahinumdom ko nga dihang si Rene Mercado pa maoy hepe sa Mining and Regulatory Board sa siyudad, napahunong niya ang quarry operations sa ilado kaayong negosyante. Tungod niini, ang negosyante napugos paglukat og permit ug nakabayad og kapin P2 milyones.

Sa ato pa, kon dili ninyo aksiyonan ang mga illegal quarry operations, makapaduda na. Palihug lang, lihok mo aron dili mamilegro ang kinabuhi sa katawhan duol sa mga quarry operations.

Kamong mga nagpuyo diha nga nameligro, pahibaw-a ko ninyo sa 0943-0766611.