EDITORYAL - May mapaabot nga hustisya?

Dili na bag-o sa Pilipinas kining mga pagdahili sa yuta nga diin adunay mga kinabuhing nakalas ug kabtangan nga nangatabonan og yuta nga dili na mabalik pa.

Ang mga dapit diin adunay makamatay nga mga landslides nahitabo duol sa mga minahan ug quarry areas diin giupawan ug gikubkob ang milyones ka tuig nang kabukiran aron pagkuha og mga minerales.

Gawas sa pagdahili sa yuta, adunay mga insidente sa mga pag-awas sa mga tubig gikan sa mga open pit sa mga dagkong minahan nga nagdala og makahilong kemikal padung sa mga kasapaan ug tinubdan sa tubig diha sa ubos.

Niining bulan sa Septiyembre duha ka landslides ang natala nga mikalas og lapas 100 ka mga kinabuhi didto sa Itogon, Benguet ug dinhi sa Dakbayan sa Naga sa Cebu.

Tinuod nga nakadugang gyud ang pagsige og uwan sa nasud nianang mga adlawa, apan ang duha ka mga lugar diin kini nahitabo adunay minahan (Benguet) ug pagpangubkob (Cebu) og anapog.

Dili gyud nila malilong nga ang nakatabon sa mga biktima gikan sa lugar diin nahimutang ang minahan ug quarry area. Si Cebu South District Congressman Rodrigo “Bebot” Abellanosa kinsa tsirman sa committee on environment mopatawag og house inquiry bahin sa nahitabong duha ka mga landslides.

Posibleng matuki dinhi kon aduna bay tulobagon ang mga kompanya, opisyales ug kon unsa nga mga balaod ang pandayon aron dili na kini masubli pa.

Sa pagkakaron ang mga kabanay sa mga biktimang nakalas naglibog kon asa sila mangita og hustisya.

Laing pangutana karon, kinsa man kaha maoy mobayad sa mga danyos nga ilang nahiaguman. Ang mga kompanya bang nakakwarta niining minahan ug quarry operations o ang gobiyerno.

Subo kaayong pamalandungon nga bisan pa og mabayran og kwarta ang mga banay, dili na gyud mabalik ang kinabuhi sa mga namatay ug labaw pang sakit isipon kon ang mga negosyanteng nakasapi niini magpabiling gawasnon.