EDITORYAL - Makadaot ni Duterte

Naukay og maayo ang nasudnong politika sa Pilipinas tungod nila ni Pres. Duterte ug ni Senador Antonio Trillanes IV. Daghang nalipay sa mga supporters sa presidente sa dihang gibakwi sa pangulo ang amnestiya nga gihatag sa miaging administrasyon ngadto sa senador.

Si Trillanes usa sa mga junior military officers nga nag-alsa batok sa gobiyerno tungod sa matud pa grabeng kurapsyon sa administrasyong Gloria Macapagal Arroyo ug sa sulod mismo sa Armed Forces of the Philippines.

Dihang nakalingkod si kanhi presidente Benigno Simeon “Noynoy” Aquino, gihatagan si Trillanes ug mga kaubanang rebeldeng sundalo og amnestiya.

Si Trillanes nahimong labing saba kaayong kritiko ni Duterte. Daghan ang nagtuo nga samtang nagkadugay sa pagsige niya’g yagyag nadutlan na ang presidente.

Pinaagi ni Solicitor General Jose Calida, gikatahong may sayop ang paghatag og amnestiya kang Trillanes kay di si Aquino ang nipirma kondili ang kalihim sa Department of National Defense.

Nalipay ang mga supporters ni Duterte sa pagtuo nga mapriso na gyud ang nagsige og daug-daog sa ilang idolo.  Apan unsa bang pagkaunsaha nga nabaraw kini. Way korteng gusto moisyu og warrant of arrest kay wala man siya’y kaso. Dili sab siya mahimong ikiha pagbalik bahin sa iyang pagrebelde kay supak kini sa balaod.

Kon ipamugos, kinahanglang apilon ang ubang rebeldeng sundalo nga ang uban nagserbisyo na karon kang Duterte.  Ang maong amnestiya gidasonan sa Kongreso subay sa nalatid sa Konstitusyon. Apan sa pagsabot ni Duterte, eksklusibo niyang gahom ang paghatag og amnestiya.

Apan lahi man ang gimando sa Konstitusyon kay kinahanglan pa diay kini og pagtugot sa Kongreso.  Sa ato pa, di eksklusibo sa presidente ang paghatag og amnestiya. Sa pagkakaron, dili makaayo kang Duterte ug sa iyang pamunoan kon si Trillanes ra iyang initan kay maoy sabaan.

Maakusahan siya nga abusado sa gahom aron lang gukdon iyang mga kritiko ug makita kini sa mga tawo nga martir ang senador, alaot si Duterte niini.