Ngano sa gabii manakit ang batiis (1)

Tingali nakamatikod kita nga sa kagabhion ilabi na og nakatulog na kita, maoy itukar nga pasayawon ang atong batiis sa labihang kasakit, nga ginganlan og ‘nocturnal leg cramp’.

Dili lang makausa nga ato kini nga masinati, kay magbalikbalik kini nga mopuwerhisyo sa atong katulogon.

Nga mag-alindasay nga dili makatanday aron hupayon ang nagngulngol nga kasakit.

Kining ‘nocturnal leg cramp’ o pamikog sa batiis, ngano nga sa gabii man gyud kita niini hasulon.

Unsa may maayo nga buhatong remedyo  aron mawala na kini. Kay di kita makatarong sa atong pagtulog nga makuryentihan sa kasakit ang batiis.

Kini man gud nga panakit sa batiis nato, resulta kini sa dugay o taas-taas nga oras nga walay lihok, mao nga sa gabii ini’g tulog pukawon kita kon magsugod na’g ngulngol ang bagtak, paa, ug mahimo nga ang batiis maapektahan sab.

Sagad gyud niini, sa sinugdanan mokalit lang og sakit unya taudtaod mga pipila ka minutos, mawala ra sab dayon.

Nga kon mawala na ang pasiunang senyales sa panakit, mosunod ang pamaol sa kaunoran nga maoy pabiling  magbuntag kini nga magsakit nga morag gipanusokan og mga dagum.

Wala kini gipili mga babaye o malalake man, basta mag-edad na nga lapas sa 50 anyos, tandogonon na gyud ning maong isyu sa panglawas.

Aduna kini mga kalainan sa diskripsyong medikal isyu sama sa mga mosunod;

* RLS (Restless Leg Syndrome) – maoy tinguha nga palihokon ang batiis, samtang ang ‘nocturnal leg cramp’ mopugong kini sa pagpalihok sa batiis.

Ang paglihok sa batiis sa RLS, makahupay kini sa panakit, samtang sa pamikog (nocturnal leg cramp) sa batiis maoy moaghat nga mongulngol ang kasakit.