Mihupas ang magic?

Sa duha ka panagtigum sa Dakbayan sa Sugbo kaniadtong Domingo, nagpalabwanay ang kampo sa Bando Osmeña Pundok Kauswagan sa administrasyon ug ang Barug-PDP Laban sa oposisyon kon kansang grupo ang adunay daghang partisipante.

Base sa taho, mas daghan kuno og partisipante ang rally sa Barug-PDP Laban nga didto gipahigayon sa Plaza Independencia.

Matud pa nga dili momenos sa 30 mil ka tawo ang mitambong sa maong kalihokan.

Siguro tungod usab kini sa gipahigayon nga concert nga daghang batan-on ang nadani.

Sa bahin sa BOPK ni Mayor Tomas Osmeña, mas gamay kuno ang nanambong didto sa Plaza Sugbo

Nagdahom ko nga dugokon gyud kini tungod lagi kay daghan ang nagpaabot nga iyagyag ni Osmeña ang iyang kayugot ngadto sa kapolisan.

Apan napalaw diay ko ug ubang tigpaniid.

Hilom ang mayor niadtong higayona mahitungod sa iyang word war batok sa liderato sa kapolisan kinsa iyang gipasanginlan nga maoy nagpaluyo kuno sa mga pagpatay dinhi sa Sugbo.

Gani, iyang giakusahan nga adunay mga polis ug sibilyan nga gikan sa laing lugar ug ania sa Sugbo karon nga mga hitmen kuno sa kapolisan ug usa siya sa mga target.

Pruweba kuno niini nga plano nga pagpatay kaniya mao ang mga death threats nga iyang nadawat.

Hinuon kon atong basihan ang bul-og sa katawhan nga misalmot sa maong mga rally, nagpasabot ba kini nga mas daghan na og mga supporter silang Bise Mayor Edgardo Labella ug ang oposisyon?

Kini ilabina nga nagkaduol na ang sunod nga bugnong lugaynon?

Kon adunay eleksiyon karong adlawa, nagpasabot ba kini nga klaro nga modaug gayud ang kampo ni Labella, kinsa nakasandig sa opisina ni Presidential Assistant for the Visayas Michael Dino ug mismo kang Presidente Rodrigo Duterte?

Siguro padayon karong nagpangalot sa ilang ulo si Osmeña ug mga sakop sa BOPK ngano nga nalabwan sila sa numero niadtong bangga sa mga rally.

Gilupig kaha sila sa estratehiya o daghan siguro ang dili na gusto maminaw sa laay na nga witik sa administrasyon sa mga kontra niini sa politika?

Mihupas na ba ang magic sa BOPK ug nga gusto na ba usab sa katawhan ang adunay bag-ong nawong nga modumala sa renda sa pangagamhanan sa dakyanan sa Sugbo.

Ato kanang mahibaw-an sa resulta unya sa piniliay karong Mayo.