Siyaok ni Trillanes

Delikado nga sa sunod nga mga adlaw mabalhog pagbalik sa bilanggoan si Senador Antonio Trillanes gumikan niining pagbalewala sa amnestiya nga gihatag kaniya kaniadto sa administrasyon ni Benigno “Noynoy” Aquino III.

Ang maong amnestiya naangkon kuno ni Trillanes human siya mibalik sa sabakan sa gobiyerno human sa iyang pagrebelde batok sa administrasyon ni Gloria Macapagal-Arroyo dihang anaa pa kini sa serbisyo sa militar.

Apan matud pa sa kasamtangang administrasyon, kulang ang mga rekisitos alang sa maong amnesty. Kini ang hinungdan ngano nga mimando si Presidente Rodrigo Duterte nga ma-revoke ang maong amnestiya ni Trillanes.

Nagsige og siyaok ang kampo karon ni Trillanes nga political harassment ang gibuhat sa kagamhanan kaniya, sama kuno sa gibuhat niini ni Senadora Leila de Lima nga atoa karon nagtingkagol sa prisohan.

Aduna bay bulok sa pulitika ang pagrebokar sa amnestiya ni Trillanes?

Aw, dili na lamang kita magpagoryogoryo pa.

Klaro kini nga dula sa pulitika taliwala niining init nga binatoay og isyu sa oposisyon ug administrasyon.

Hinuon, sa akong nakita, sukli lang kining pagrebokar sa amnestiya ni Trillanes sa sige niyang atake sa administrasyong Duterte.

Kay kon nagpakahilum pa lamang unta kining maong senador, dili siguro masimhotan sa kagamhanan ang baho sa giingong kapalpakan sa amnestiya ni Trillanes.

Dili ba nga grabe man usab si Trillanes nga makapahit sa kasamtangang administrasyon?

Dili ba nga kon makabira kini batok kang Presidente Rodrigo Duterte, halos nahisama man kini sa iro nga ga- sige og paghot bisan kon walay igong ebidensiya?

Karon nga ang administrasyong Duterte na usab ang mihimo og opensiba batok kaniya, haskang dalia sa iyang kampo nakasinggit og political harassment.

Dili ba nga usa man usab ka political harassment ang gihimo ni Trillanes sa sige niyang pahit ni Duterte bisan kon walay igong basihan?

Ang angay hinuon nga buhaton sa senador mao ang pagyagyag og mga ebidensiya nga insakto siya sa mga requirements ug walay trampas ang amnestiya nga gikalupo ni Aquino kaniya ug sa uban pang rebeldeng sundalo.