Inflation

Miabot og 6.3 porsiyento ang inflation rate dinhi sa Central Visayas niadtong buwan sa Agosto sigun sa talaan sa Philippine Statistics Authority. Kini na maoy labing taas nga pagsulbong sa inflation rate sa nasud sulod sa milabay’ng 10 ka tuig.

Apan unsa bay ipasabot sa inflation ug unsay epekto niini alang natong ordinaryong mga molupyo labi na sa mga kabus. Ang inflation, sa yano nga pagkasulti nagkahulogan og pagsaka sa presyo sa mga palaliton ug serbisyo diha sulod sa usa ka ekonomiya.

Ang PSA dunay mga tamdanan pagsukod sa inflation rate matag buwan. Duna silay listahan sa mga produkto ug serbisyo nga gitawag nila og “inflation basket” diin maoy magsilbing sukdanan sa inflation rate.

Ang mga batid sa ekonomiya mipasabot nga ang inflation mahitabo kon mosaka ang presyo sa mga baligya ug serbisyo tungod sa dakong panginahanglan. Laing hinungdan sa inflation mao ang kalit nga pagsulbong sa presyo sa mga produkto tungod sa pagmahal sa mga materyales ug ubang gikinahanglan alang sa produksiyon.

Ang naawahi maoy tataw nga hinungdan sa pagsulbong sa inflation rate dinhi sa nasud. Ug way laing kapasanginlan niini mao ang tax reform program sa administrasyong Duterte nga nagpahamtang og excise tax sa mga produktong petrolyo.

Ang TRAIN Law nga gipasiatab sa gobiyerno miresulta sa pagsaka sa presyo ug serbisyo. Tungod kay hapit tanang produkto konektado man sa lana, ang bisan unsang usbaw sa presyo sa produktong petrolyo makaapekto sa ubang produkto.

Kay niinsister man gyud ang gobiyerno nga ilakip ang produktong petrolyo sa pagpahamtang og dugang buhis ubos sa TRAIN Law taliwa sa mga pagsupak, angayan untang nipatuman ang kagamhanan og mekanismo aron pagsagang sa epekto niini ngadto sa mga kabus.

Dili pa igo ang tax exemption nga gihatag ngadto sa mga nag-income og P250 mil ang tuig aron pagsagang sa epekto sa pagsulbong og maayo sa presyo sa mga batakang palaliton tungod sa pagpatuman sa tax reform.

Nakadaginot tinuod ka sa buhis apan mahurot ra pud ang maong kantidad pagtapal sa umento sa inadlaw nimong gasto. Resulta mas naapektuhan ang mga kabus kay sa mga kapitalista nga yano ra sab nga mopasa sa bisan unsang umento sa ilang operasyon ngadto sa mga konsumidor.