EDITORYAL - Naghigwaos nga ekonomiya

Ang usa ka nasud dili makalahutay kon huyang kaayo ang ekonomiya niini. Dili kini makatubag sa mga batakang panginahanglan sa katawhan niini kon dili maayo ang ekonomiya. Ang ekonomiya maoy nagbuhi sa usa ka nasud.

Bisan gani ang mga komunistang nasud nga nagsalig sa kaugalingon abot aron iapud-apod sa ilang katawhan nagkinahanglan og lig-ong ekonomiya aron motuyok ang kwarta niini sa sud ug sa gawas sa ilang nasud. Ang Pilipinas nakasinati karon og grabeng pagsaka sa inflation rate, daghan ang wala kasabot niini ilabi na ang uban dili gyud gustong makat-on bahin niini kay lagi lisod kuno ang matematika.

Apan di man tuod sila interesado niini, apan nabatyagan nila nga nagkamahal na ang presyo sa mga palaliton karon. Kay bisan ang batakang mga palaliton sama sa bugas, asukar, mantika, ug ubang mga serbisyo misaka na og maayo.

Ang usa ka pangulo sa nasud dili makapalipay sa katawhan niini kon usa lamang ka parte sa iyang pagdumala ang iyang tutokan. Dili mahimong motutok lang siya sa usa ka butang ug ang uban iyaha lang pasagdan. Walay tarong nga presidente nga mosugot nga maghigwaos ang iyang ginsakopan. Apan unsa man diay ang kinahanglan niyang buhaton?

Kinahanglang iyahang buhaton nga mamahimong paborable sa mga magpapatigayon ug sa mga konsumidor ang iyang economic policies, taxation, business climate, peace and order ug political environment.Gikinahanglan niyang manguha og mga haom nga eksperto nga maoy mopatuman sa iyang economic policies. Dili lang tungod kay sila higala o classmate kaniadto sa kolehiyo kondili kadto gyud  nga makamaong mangita og pamaagi nga ang negatibong epekto sa maong mga palisiya dili mabatyagan sa katawhan.

Sama na lang niining kontrobersyal karong mga reporma sa buhis nga gipatuman ni Pres. Duterte. Daghan ang wala malipay kay naut-ot hinuon ang katawhan. Angay unta nga mangita og laing mga pamaagi ang mga gitahasan ni Duterte nga dili mabug-atan ang katawhan. Kay kon dili, mas maayo pang manganaog sila sa ilang katungdanan.