Hasta munisipyo delikado na

Ang munisipyo kompleto. Dunay opisina para sa mayor, ubang opisyales ug mga kawani nga nangalagad alang sa katawhan.

Anaa puy presinto sa kapolisan. Ug adunay prisohan alang sa mga malapason sa balaod. Busa, gikahadlokan sa mga daotan.

Sa gamay pa ko, mahadlok gyud ming mga bata nga makasala. Kay pirme ming ingnon sa  among ginikanan nga ipadakop sa polis kon magpabadlong. Hinungdan, nga kon makakita mig polis?

 Ay, manago mi, uy, sa saya sa among Nanay! Da, tagbaw lagig panapo! Nag-ayo, makita ang gisul-ob niyang hapin nga may markang ‘General Milling.’

Nagdako mi nga usa ka law-abiding citizen. Sa hingkod na among edad, didto pa mi makasabot nga kon magbinuotan lang ang tawo, dili angay mahadlok sa kapolisan.

Kay sila mao ang magbalantay sa kalinaw, ang tigdakop sa mga kriminal aron kapanalipdan ang mga nagtinarong.

Taas kaayo ang pag-ila sa katawhan ngadto sa munisipyo. Kini ang dapit nga kinaseptihan estaran sanglit guwardiyado’g mga polis, kinsa andam moprotehir sa tawhanong katungod batok sa mga mapangahason.

Tingali, mao sab kini ang natanom sa kasingkasing ni Ronda Mayor  Mariano Blanco III, kinsa naapil sa listahan sa mga narco-politicians ni Pres.  Rodrigo R. Duterte niadtong 2016, diin gumikan sa maong pasangil, wala niya kalikayi ang anino sa kahadlok nga magsige’g pasunding sa iyang pag-inusara.

Hinungdan, nga imbes adto siya mopahulay sa ilahang balay panahon sa kagabhion, gipalabi niya nga anha na lang magkatulganan sa kuwarto sa iyang opisina.

Kompiyansa ang mayor. Kay guwardiyado gud og mga polis ang munisipyo! So, the safest place for him to stay and sleep at night.

Apan naunsa ba, nga miulbo man ang masipang balita nga gipatay siya sa wala mailhing mga mamumuno sulod mismo sa iyang opisina samtang natulog?

Gitayming pa gyud nga kusog ang ulan samtang ang grupo sa kapolisan, matud pa, wala diha kay  gikauban ni Police Chief Jay R. Palcon nga mi-serve og warrant of arrest sa usa ka kriminal. May polis baya nga nahabilin sa police station. Pero wa kahibalo sa dugoong hitabo on time. Ngano kaha?

Nagpasabot ba kini nga hasta munisipyo ning atong panahon, dili na luwas nga kadangpan sa nanginahanglan?