Uhaw sa gugma sa ginikanan
Niay estorya nga gipaambit ni Boss Fil, higala kong manedyer, kay gusto siya nga kining akong kolum mahimong tuburan sa mga maayong pagtulon-an nga mapupo gikan sa mapatik nakong mga sinulat. Matud niya, didto sa usa ka bukid, may tigulang babaye nga naghaling para sa ilang pamahaw, kinsa durong tayhop sa mga kahoy’ng gisugnod.
Dihang mibukal na ang gitak-ang, gilundan kini sa tigulang og duha ka latang binlod. Wala siya kamatikod nga dinhay batang bulingit nga miagi, kinsa kalit lang midasmag niya. Naumod intawon ang tigulang didto sa nagbutokbutok nga binukal ug maayong pagkahilos sa iyang nawong.
Gipadakop ang bata sa polis. Pero gibalhin-dala didto sa DSWD kay may balaod baya nga kon bata ang makasala, bisa’g nakapatay pa kini’g tawo, dili gyud mapriso. Hinunoa, iintriga ngadto sa DSWD aron i-rehab ug giyahan sa hustong dalan sa kinabuhi.
Gani, niining bag-o, dinhay video coverage sa internet, nagpakita sa usa ka bata nga namunal og barateha sa laing bata hangtod namatay. Ang polis nga gitugyanan sa maong batang kriminal miklaro nga sumala pa sa Juvenile Justice Law, di gyud kini mabilanggo. Pagkayabag nga matang sa balaod!
Dihang ang batang bulingit nga nanukmod og tigulang didto na sa mga kamot sa DSWD, gipangutana sa tagdumala kon nganong gibuhat man kadto sa bata? Sa nagtibing ngabil, gitubag sila:
“Tungod kay sukad sa akong pagkamatngon og buot, wa gyud ko makatilaw og hawok sa inahan, gakos sa amahan ug mga kamot sa ginikanan nga mapinanggaong moagak ug motudlo hain ang sayop ug asa ang husto.”
Pagkatulokibon nga pamahayag! Pamahayag nga daw nagtulisok sa ginikanan, kinsa pakyas sa paghatag og langitnong pagmahal sa mga anak. From womb to adulthood, it’s our obligation, parents, to provide children sufficient food for their body and soul hangtod nga makagraduwar sa kolehiyo, makatrabaho ug makabarog na sa kaugalingon nilang tiil subay sa kabubut-on sa Ginoo.
Apan ato ba kining gihimo? Kay kon gibuhat pa kini sa tanan, dili gyod unta mahitabo nga mobaha ang illegal drugs syndicates, smuggling ug corruption activities sa Pilipinas, diin atong nakita nga bisan ang batong bakal ni Pangulong Duterte, naglisod sa pagsumpo.
- Latest