Mensahe ni Duterte

Niepekto na gayud ang paghingalan ni Presidente Rodrigo Duterte sa mga kapolisan sa Dakbayan sa Talisay nga nalambigit kuno sa ilegal nga druga.

Kini sa dihang girelibo sa Camp Crame ang tanang sakop sa Talisay City Police Station.

Ang tanang 65 ka sakop sa estayonan sa pulis sa maong dakbayan giratsada nga gipulihan.

Bugtong si Superintendent Marlu Conag ang gipabilin sa iyang puwesto isip hepe sa Talisay City Police Station.

Daghan ang nakaingon nga mas maayo nga gihulipan ang tanang sakop sa kapolisan sa maong dakbayan kay anaa kanila ang problema ngano nga dili gayud mapuo ang negosyo sa ilegal nga drugas sa maong siyudad, ilabina sa Barangay Tanke.

Gani, mao nga dili gayud masulbad ang maong problema tungod usab sa mga taho nga adunay mga pulis sa maong dakbayan kinsa mga protektor sa negoyo sa druga.

Ug kining mga taho  niabot gayud ni Presidente Duterte. Bisan ako makaingon nga morag tinuod gayud kining maong mga alegasyon batok sa pipila ka pulis diha sa Talisay City.

Kay nganong hangtod karon baniog pa gihapon ang maong ilegal nga negosyo diha sa Barangay Tanke ug uban pang barangay sa maong dakbayan.

Hinuon kugi ang suporta sa kagamhanan sa maong siyudad sa kapolisan sa ilang kampanya batok sa druga.

Wala magkulang si Mayor Eduardo Gullas ug ubang opisyal paggahin og resources alang sa krusada batok sa kriminalidad.

Gani, sa pagbalik ni Gullas pagkamayor kaniadtong 2016, iyang gibaharan ang mga drug lord nga molayas gikan sa dakbayan.

Ug hangtud karon, maayo ang relasyon tali sa mayor ug liderato sa kapolisan.

 Maayo kini nga senyales tungod kay nagpasabot usab kini sa maayong pagtambayayong sa lokal nga kagamhanan ug kapolisan batok sa krimen, ilabina sa pagpayuhot sa ilegal nga druga.   

Apan tungod siguro sa ka seryoso sa problema sa druga mao nang kutas alang sa kapolisan sa Talisay ang pagsulbad niini. 

Kini ilabina nga nakagamot na kini ug nga adunay mga pulis ang mismo ang protektor.

Hinuon, ato lamang lauman nga sa paghulip sa kapolisan sa maong siyudad, masulbad na sa katapusan ang maong problema.

Apan magkinahanglan kini og subsob nga paggukod niadtong nalambigit sa maong ilegal nga binuhatan. Klaro nga ang nahitabo sa kapolisan sa Talisay usa ka mensahe gikan sa administrasyon ni Duterte nga kinahanglan dili magpagoryogoryo ang kapolisan sa ilang trabaho, ilabina sa kampanya batok sa ginadiling druga.

Siguro dili lamang ang siyudad sa Talisay. Daghan pang mga dakbayan diin laganap ang druga ug kansang kapolisan ang angay usab nga maleksiyon tungod kay nagkulang usab sila sa ilang kampanya. Gani lakip na niini ang mga dakbayan sa Metro Cebu.