Wala ka palag

Hangtud karon, wala pa gayud mohupas ang epekto sa birada ni Presidente Rodrigo Duterte ngadto kang Mayor Tomas Osmeña sa dakbayan sa Sugbo atol sa pagbisita sa presidente didto sa siyudad sa Mandaue sa niaging semana.

Hangtud karon nagbaha pa sa social media ang nagkadaiyang reaksiyon kalabot sa maong banghag sa presidente kang Osmeña.

Daghan ang mipabor sa pagkastigo sa presidente sa mayor apan daghan usab ang misimpatiya sa mayor.

Apan nagpakita lamang kining pika ni Duterte kang Osmeña nga adunay alamag ang Palasyo sa mga lokal nga panghitabo.

Hinuon dili lamang sa Sugbo apan lakip na usab sa ubang local government units.

Kini gumikan usab kay adunay mga gaway ang presidente nga andam mopindot kaniya sa unsa mang lokal nga isyu.

Ang rason nga miulbo si Duterte tungod siguro sa daghang isyu nga gikalambigitan ni Osmeña karon.

Hinuon, mas maayo na lamang nga wala mikubit si Osmeña sa mga buwelta sa presidente.

Sa iyang Facebook page, igo na lamang miingon ang mayor nga katungod sa presidente ang unsa mang iyang isulti.

Siguro kon mitubay pa si Osmeña unya mipahit usab kang Duterte, nan dili gayud lung-an sa presidente ang mayor.

Ug akong nakita nga wala gayuy dag-anan si Osmeña tungod sa ka gamhanan sa presidente.

Ang tubag ni Osmeña sa pika sa presidente dakong sukwahi sa iyang naandang mga buwelta sa iyang mga kontra dinhi.

Dili ba nga grabe ang opensiba sa mayor sa kapolisan kinsa iyang giakusahan nga maoy nagpaluyo sa mga pagpatay sa Sugbo.

Isog usab ang mayor nga misungag sa mga taga oposisyon diha sa City Hall nga iyang giingon nga grabe usab nga nakababag sa iyang mga proyekto.

Gani, sa nakalabay nga mga eleksiyon, grabe ang opensiba sa mayor batok sa iyang mga kontra aron modaug ang iyang mga batos.

Apan niining hapak sa presidente kaniya, wala gayud ka palag si Osmeña.

Mora siya og piso nga nabasa. Aw, hinuon presidente man ug wala gayud siyay amor kon magpataka siya og sungag sa labing gamhanang tawo sa nasud.