Eddiegul may Ginoo

Suhito ko sa pagka Diyosnon ni Talisay City Mayor Eduardo ‘Eddiegul’ R. Gullas. Kay ubay-ubay nang higayon nga makit-an ko sa iyang pagsimba sa lainlaing katolikong simbahan. Sa Guadalupe Parish Church lang, dinhay higayon nga nag-abot mi sa simbahan, diin bisan tapos na ang misa siya padayong nag-ampo samtang naggunit og prayer book. Gawas ni Mama Mary ug Sr. Sto. Niño, deboto sab sa pamilyang Gullas si San Francisco de Asis.

Ning pipila ka bulan nga milabay, samtang nagluhod ko sa right wing side sa Redemptorist Church alas 4:00 sa hapon nga misa-nobena sa adlaw’ng Miyerkules, nakurat ko dihang may mitupad nako’g luhod  pagbayaw na sa pari ang ostia sa akto sa Eyukaristiya. Paglingi nako, pastilan, si Eddiegul diay! Simple ra iyang pamiste, dili luho ug branded –naghulagway sa tinuoray niyang pagkatawo nga siya usa ka linalang nga mapaubsanon, mahigalaon ug maalagaron. 

Wa ko kakita nga may kuyog siyang bodyguard niadtong aktoha. Gani, human sa misa, wala gyud ko batia’g kataha sa pagpakighinabi niya’g kadiyot, diin kinasingkasing siyang mitubay. Hinuon, dili ra kadtong higayona nga nagkaabot among dalan sulod sa simbahan ug nagkaestoryahanay. Mao, nga nakaila gyud ko sa iyang kinaiya. Soft spoken, very humble and so religious. Bisa’g anaa ang iyang kahimtang nahitalay sa hataas nga hut-ong sa katilingban, pirme gyud siyang manaog sa ubos aron iyang mabati ang kahimtang ug panginahanglan sa mga kabos. Dili hait og dila si Eddiegul nga makasamad sa kasingkasing. Kondili, bugnaw’ng tubig nga makapalong sa naghuramentadong kalayo!

Niining bag-o, gisaway ni Cebu City Mayor Tommy Osmeña ang iyang pagpangalagad isip alkalde sa Talisay City. Kay wala gyud kuno siyay epektibong gihimo pagsumpo sa illegal drugs sa ilang dapit. Kay imbes mohinay, naghitak gihapon.

 Ang mga pagsaway ni Mayor Tommy morag dakong bato nga gilabay ngadto sa nawong ni Eddiegul. Apan inay baslan ni Eddiegul og bolang puthaw, ang mithi sa pagpaubos maoy iyang gibawos.

Dili kuno siya motubay ni Osmeña. Ug dili siya makiglantugi. Kay buhi kanunay sa kasingkasing ni Eddiegul ang mga pulong sa Ginoo: “Love your neighbors as you love yourself. And above all, love your enemies.”  Ug hugtanay niya kining gisunod.