Lutuan sa license plate bidding, nangangamoy
ALAM n’yo ba na hanggang ngayon, wala pa rin ang mga car registration plates na nagkakahalaga ng P3.6 bilyon na kinontrata ng pamahalaang Aquino? Tagal na nito! Nang kumandidato sa pagka-pangulo si Pres. Duterte, naging anti-Noynoy issue pa nga niya ang “Republikang Walang Plaka.” Ang pangako niya: hindi na ito mauulit sa kanyang pamumuno.
Ngunit bakit nakikipagnegosasyon sina Transportation Sec. Art Tugade at Land Transportation Office Chief Edgar Galvante sa mismong kompanya na nagdulot ng sakit ng ulo sa milyun-milyong motorista? Iyan ang kompanyang dapat nagdeliver ng mga naturang plaka noong pang 2013 hanggang 2016, pero bokya! Tila naglalaro sa isip ng dalawang opisyal na ituloy ang maanomalyang kontrata ng Aquino government kahit may mga isyung legal na dapat bigyang hustisya. Aba’y nalabag sa lumang kontratang ito ang maraming probisyon ng procurement law!
Inanunsyo ni Tugade sa media na may kakayahan na ang DOTr at LTO na gumawa ng sariling plaka dahil mayroon ng makina para rito. Kung gayon, bakit makikipag-usap pa sa dating kompanya na gumawa ng kapalpakan? Sa ilalim ng palpak na kasunduan ay gagawin ang plaka sa Netherlands pero sa India lang pala ginawa at semplang ang kalidad.
Kung tayo na mismo ang gagawa imbes na gawin sa ibang bansa, mas makabubuti dahil marami ang mabibigyan ng trabaho. Kung kailangang makipag-bidding, dapat ilahok lamang ang ibang mas kuwalipikadong makapag-supply at huwag isali ang walang kakayahan.
Nakakaamoy tayo ng lutuan ah. Imbes na gumawa ng bagong bidding, mukhang may ginagawang “panghihilot” sa dating contractors na ginamit sa ilalim ng administrasyong Aquino. Paalaala lang, Noong 2015, may atas ang COA sa LTO na huwag bayaran ang naturang supplier dahil sa mga paglabag sa procurement law. Nasilip ng COA na maanomalya ang pinasok na kontrata ng pamahalaan sa Knieriem BV Goes and Power Plates Development Concept Inc. (JKG-PPI) noong 2013.
- Latest