Problema ni Loot

Sa iyang sitwasyon karon, naputos sa dakong problema si Daanbatayan Mayor Vicente Loot. Resulta kini sa alegasyon ni Presidente Rodrigo Duterte nga nalambigit siya sa negosyo sa ilegal nga druga kaniadtong usa pa kini ka heneral sa kapolisan.

Unang problema ni Loot mao ang iyang kahadlok mahitungod sa dakong hulga sa iyang kinabuhi nunot sa maong akusasyon.

Kini ang hinungdan ngano nga dili na kuno siya magpakita sa publiko, ilabina human niadtong gisulayan siya pagpatay sa niaging mga bulan.

Ikaduhang problema ni Loot mao ang iyang trabaho isip amahan sa lungsod.

Sukad niadtong pakyas nga pagkutlo sa iyang kinabuhi, wala na kuno mo-report sa iyang opisina sa Municipal Hall ang mayor.

Matud niya, dili una siya magpakita sa publiko gumikan sa mga hulga sa iyang kinabuhi. Anaa ra siya nagpahipi sa daplin.

Apan pabilin kuno ang iyang pag-atiman matag adlaw sa iyang mga gimbuhaton isip mayor sa lungsod.

Apan dili nato malikayan ang iyang mga konstituwente nga mangita sa iyang presensiya diha sa Balay Lungsod. Kini ilabina kon aduna silay panginahanglan nga makigkita kaniya sa personal. Klaro nga problema gayud kini kanila.

Niining maong kalamboan, daghan ang nangutana kon aduna bay kalapasan sa balaod ang dili na pagtunga ni Loot sa iyang opisina.

Ambot kaha kon aduna bay pagtugot sa balaud ang sama sa sitwasyon ni Loot.

Angay kini nga klarohon sa kagamhanan, ilabina sa Department of the Interior and Local Government. Hinuon, matud ni Gobernador Hilario Davide III nakasabot siya sa seryosong sitwasyon ni Loot.

Wala kunoy nakita nga dautan si Davide sa dili pagtunga sa mayor sa iyang buhatan sa munisipyo basta matuman lamang ang iyang obligasyon sa katawhan. Ug miuyon usab niini ang direktor sa DILG sa lalawigan.

Hangtud kanus-a makalahutay si Loot niining iyang sitwasyon?

Gani ang ubang mga lokal nga opisyal nga gipasanginlan ni Duterte nga nalambigit sa druga mikalagiw tungod sa kahadlok nga maabtan sila sa sanggot sa kamatayon.

Hinuon, katungod ni Loot ang pagprotehir sa iyang kaugalingon gikan sa mga hulga sa iyang kinabuhi. Alang kaniya, kinahanglan nga magpadayon ang iyang serbisyo ngadto sa iyang katawhan kinsa mituboy kaniya sa puwesto.

Apan samtang nagung-ong pa ang akusasyon sa presidente batok kaniya, pabilin nga dili gayud magpakita sa publiko si Loot.

Hinuon, makapaabot usab ang iyang mga konstituwente nga dili mapalyar ang iyang obligasyon ngadto kanila.