Pag-resign ni Duterte, paukyab ra

Tatay Digong, mo-resign? Pikat!!! Nakalimot na ba ta niadtong naghinangat pa ang national elections, diin puwerte niyang pamalibad nga dili gyod  modagan pagka Presidente sa Pilipinas bisag daghan na ang nangusog nga palansaron siya?

Sa sige niyang pamalibad, hasta mga walay pagpakabana, nainteresado moukay-subay sa tinuoray niyang kinabuhi labi na kon giunsa niya pagdala ang Davao City isip maoy mayor nga wala gyuy pilde-pilde, diin nahibaw-an hinuon sa tibuok kalibotan nga siya gikahadlokan sa tanang daotang elemento labi na sa mga illegal drugs syndicates, kinsa hinay-hinay’ng nanglayas sa ilang lugar human niya bahari: “I hate drugs. If you don’t stop and stay away from my hold, I will kill you.” Aw, namahawa gyud mga drug lords! Bisan ako, nakasinati unsa kamalinawon puy-an ang siyudad sa Davao kay hasta kapila na man ko makabalikbalik og kadestino didto, bisan adtong  gitawag pa ang Agdao ug Nicaragdao.

Unsay nahitabo? Aw, nahimong pangulo si Duterte tungod sa iyang padilidili! Ug kitang tanan, nakasaksi  giunsa niya pagdala atong nasod sugod sa unang adlaw sa iyang pagpangalagad. Kon unsay gisaad niya panahon sa kampanya, iyang gituman.  Ang sulbad gigunitan na sa iyang mga kamot ug gibakyaw.  Apan ang problema,  kay gisigehan kini’g sagang sa mga pilderong oposisyon, kinsa ang small picture (War on Drugs) ra gyuy gisigeha’g tan-aw samtang ang whole big  picture sa unsa na kadaghan sa kaayohan nga iyang nahimo, gitakpan sa pagsige’g himog protestang bakak kay samtang kitang mga tarong gusto’g Good Change, silang mga hiwi di gusto’g tul-id!

Mao nga miingon si Tatay Digong nga mo-resign na lang siya. Kay bisa’g kamatayon nay giatubang sa mga badlongon, nagpadayon gihapon sa pagkabuloyagon. May kasingkasing siya nga kaantigo malooy sa mga daotan. Pero unsa pay iyang mahimo kon magpabiling gahi ang gitay-an nang utok sa mga illegal drugs syndicates? Mokakak? No way!

Kining gisulti niyang ‘resign’,  usa ra ka paukyab. Pagsusi lang kon ang kinabag-an sa katawhan gusto pa bang ipadayon kining iyang War on Drugs nga pirmeng gisaway sa Commission on Human Rights ug sa mga oposisyonista, kinsa sa hilom gidudahan na hinuong  kaabin ra sa mga daotan. Sa laktod, Duterte will stay until his term ends.