EDITORYAL - Impeachment na pud?

Aduna na say kasikas sa Korte Suprema nunot niining gipasaka nga impeachment complaints batok sa pito nila ka mga sakop nga nibotar pagpalagpot kang kanhi Chief Justice Maria Lourdes Sereno.

Daghan ang wala mahimuot sa pagpalagpot kang Sereno tungod matud pa gi-shortcut kini ug na-pressure ang mga hukom pagdalidali pagpalagpot kaniya tungod kay maoy gusto ni Pres. Duterte.

Ang Korte Suprema maoy kataposang dangpanan sa katawhan pagpasabot bahin sa mga balaod sa nasud.

Mahinungdanon kaayo nga independente kini kanunay ug dili maimpluwensyahan bisan sa presidente o sa kongreso.  Mao kini hinungdan nga gibutang gyud sa Konstitusyon nga parehas sila og gahom ug kagawasan paghimo og desisyon o interpretasyon sama sa ehekutibo ug kongreso.

Niadtong Huwebes, giduso sa mga magbabalaod sa oposisyon ang impeachment complaint batok nilang   Associate Justices Teresita De Castro, Diosdado Peralta, Lucas Bersamin, Francis Jardeleza, Noel Tijam, Andres Reyes Jr. and Alexander Gesmundo.

Gipasanginlan sila nilang  Reps. Edcel Lagman (Albay), Gary Alejano (Magdalo party-list), Teddy Baguilat Jr. (Ifugao) ug Tom Villarin (Akbayan Citizens’ Action party-list) og “culpable violation of the Constitution and betrayal of public trust.”

Si House Speaker Gloria Macapagal Arroyo miingon nga gusto niyang mapadali ang pagtuki sa complaint batok sa maong mga mahistrado ug iyaha kining iduso dayon ngadto sa House Committee on Rules aron mabasa kini atubangan sa ubang mga magbabalaod karong Martes kon iyaha nang mapirmahan. Sa mga misimpatiya ni Sereno ug sa mga nagtuong wala kini mahatagi og due process, dako na ni nga kalamboan.

Apan sayon ra kaayo ang pagduso og impeachment complaint batok sa mga impeachable officials, apan ang pangutana kon makalahutay ba kini unya sa pagkuso-kuso sa mga magbabalaod pagkwestiyon kon nakahimo ba sila og ‘impeachable offense.’

Gamay kaayo ang tsansa nga mapasar kini tungod kay mayoriya pa gihapon sa Ubos Balaybalauranan kaalyado ni Duterte. Dali ra kaayo silang makatigom og boto pagbabag niini.