EDITORYAL - Kauwawan sa Sugbo

Dakong kauwawan alang sa kapolisan sa Sugbo ug mga sakop sa Philippine Drug Enforcement Agency -7 ang pagbansag kanila ni Pres. Duterte nga mga adik.

Si Philippine National Police chief Director General Oscar Albayalde mismo na ang miangkon nga adunay “culture of corruption” sa mga opisyales sa PNP dinhi sa Sugbo.

Daghang mga polis ang gipasanginlang nangilkil sa mga drug dealers ug ang uban drug protectors gyud nga gitawag karong mga narco-cops ug nagdawatan og senemanang payola gikan sa mga drug lords.

Kon sa uban giisip kining dakong hagit para sa PNP, apan sa pagkatinuod dako kining insulto ilabi na sa mga lumad nga mga Sugboanong polis.

Ang ubang mga opisyal nga nadestino dinhi dili mga Sugboanon apan kasagaran sa mga sakop sa kapolisan lumad nga taga Cebu.

Kon bug-at para sa maong mga opisyales ang pasangil ni Duterte, mas sakit kini sama sa nagtaup nga bangkaw sa kasingkasing sa mga Sugboanong polis, kadtong mga polis nga nagtinarong sa serbisyo.

Gani si Albayalde miingon nga  adunay regional police director kaniadto dinhi sa rehiyon nga nagdawatan usab og drug money ug apil karon ang maong heneral sa narco-list ni Duterte.

Pasabot niini nga drug protector ang maong heneral. Unsa pa may mapaabot sa katawhan nga agi kontra ilegal nga drugas diha sa ubos kon ang mismo nilang heneral protektor man diay sa mga druglords?

Pagkamakaluluoy intawon sa mga Sugboanon. Maayong ang mga tarong nga lumad nga mga Sugboanong polis dili magpanuko pagdakop sa ilang mga kauban nga nagbulingbuling sa ilang organisasyon.

Maayo usab nga apilon sa tutokan sa internal cleansing kining mga polis bisan tuod wa magapil-apil sa drugas, apan sugarol, abusado, way pamatasan polis, hambugero , insultador og sibilyan, angay na silang unhan pagtaktak sa serbisyo.

Kay diha man magsugod unya ang paghimo nila og mas dagkong krimen. Krimen ngadto sa mga sibilyan ug krimen sa ilang gipanumpaang kaakohan.