Strawberry candies delikado

Usa ka concerned Filipino citizen nga atoa sa America ug suod kong higala mipadalag mensahe sa Facebook nga matod pa niya, gawas nga nag-antos ang Pilipinas sa dakong problema bahin sa illegal drugs nga ingon sa dili na gyud masumpo, aduna na poy mga sungayang negosyante nga mimugnag laing matang sa gidiling drugas  nga gitawag og ‘Strawberry Quick or Strawberry meth’.

Dunay harmful crystal meth nga gisagol sa maong candies, diin kutob sa bata nga makatilaw, sagad malandig sa ospital, unya naa gyuy wala matabang – namatay! Nakatag na sa nagkalainlaing nasod o dapit kining maong produkto nga gama sa demonyo ug gikabalisa sa akong amigo nga basig nakasulod na kini dinhi sa atong nasod.

Mga batang nag-edad og 4 anyos pataas ang target ning maong candies nga makamatay, diin mga pre-schools ug elementary nga tunghaan ang paboritong dapit-adtoon kay sayon ra ilaron ang mga inosenteng bata nga gustong biktimahon ning mga tawo, kinsa ning atong panahon, wala na gyud makailag Ginoo.

Pinangga sa akong higala ang mga apo. Kay ang apo,  iya mang gikonsiderar nga back subject. Back subject sanglit niadtong panahon nga gagmay pa iyang mga anak, nagtubo kini nga kulang sa iyang presensiya isip mao untay ilang good steward. Unsaon, iyang trabaho, sige man lag kadestino sa lainlain lugar. Natuyok na gud niya ang Luzon, Visayas ug Mindanao.

Ang kagahapon dili na malupad og balik para korehian ang unsay iyang pagkulang ngadto sa iyang mga anak.  Pero, the error committed in the past can be corrected in the future. Ug ang maong future, ania, miabot na, nga mao ang iyang mga apo, diin kon unsa mang matanga sa stewardship  ang wala niya mahatag sa iyang mga anak kanhi, karon iya nang ikadapat sa iyang mga apo.  Mao nga nakaingon siya nga ang apo, back subject.

Busa, iyang giawhag ang tanang ginikanan, eskuylahan, magtutudlo ug katawhan nga magmabinantayon sa mga matang sa candies, chocolate o  kan-onong snacks sa mga bata nga pwedeng mabutangan og crystal meth sa mga banyaga.

Tingale, wala pay nabiktima niini dinhi sa ato, Pero, mas maayo nga makalihay ta daan samtang dili pa ulahi ang tanan.