Unsay buhaton kon di ka bayran sa utang?
Dear Atty. Divine:
Ang akong silingan nangutang nako og P180,000. Ang among sabot nga bayran niya ang maong utang sud sa unom ka buwan pinaagi sa pagdata-data matag buwan.
Mibayad lang siya kausa ug human niini wa na gyud siya mobayad og karong Agosto 30 mao na unta ang katapusang adlaw alang sa pagbayad sa iyang utang. Unsay angayan nako nga buhaton kon di gyud siya mobayad? Daghang salamat.
Rica
* * *
Dear Rica,
Kon di gyud ka bayran sa utang sa imong silingan karong katapusan then imo siyang pasakaan og reklamo sa inyong barangay.
Kini aron ipatawag sa barangay ang imong silingan ug mag-atubang mo sa Lupon aron pag-settle sa inyong problema.
Kinahanglan gyud nga adunay conciliation or confrontation nga mahitabo sa barangay sa dili pa ka mopasaka og kaso sa korte batok sa nangutang nimo kay mandatory man kana nga rekisitos basi sa Sec. 412, sa R.A.7160 kun Local Government Code of 1991.
Kon di gyud mo mahusay sa barangay then that’s the time nga mangayo ka og certification to file action ug imo na unyang ipasaka sa korte ang kaso batok sa nangutang nimo. Thanks and God bless.
Atty. Divine
* * *
Alang sa inyong pangutana, ipadala lang sa Legal Corner sa Banat News sa V. Gullas St., Cebu City or email sa [email protected] og akong tubagon ang inyong pangutana pinaagi sa akong column matag Miyerkules, Sabado og Domingo.
- Latest
