EDITORYAL - Kinsa gyud ang tigbabag?

Ang isyu nga nakapalibog karon sa katawhan mao nga kinsa man gyud kanila ni Mayor Tomas Osmeña ug sa mga opisyal nga alyado sa Barug Team Rama nga dili makiangayon nga mobabag sa mahinungdanong proyekto sa dakbayan sa Sugbo.

Nagpasanginlanay sila si Osmeña ug ang mga alyado sa Team Rama nga kuno tigbabag sa mga proyekto nga unta makapalambo sa siyudad. Si kanhi mayor Mike Rama nakabaligya og 42 ka ektaryang kayutaan sa South Road Properties (SRP) sa kantidad nga P16.6 Bilyones, apan gusto ni Osmeña nga ipakanselar ang kontrata sa pagbaligya.

Ang baruganan ni Osmeña nga barato ra kaayo ang pagbaligya sa yuta nga tag P38 mil ra kada metro kwadrado, kay kuno ang yuta sa SRP nagkantidad na kini og labing menos usa ka gatus ka libo ka pesos ang matag square meter. Ang mga kontra ni Osmeña miingon nga daghan na unta ang makatrabaho kon wala pa babagi sa mayor ang proyekto sa tulo ka dagkong investor nga nakapalit sa yuta.

Karon, mibawos usab ang mga alyado sa Team Rama pinaagi sa pagbabag sa tinguha ni Osmeña nga pakigkumboya sa dakong kompaniya nga motukod og international resorts and hotel diha sa Kawit Island pinaagi sa Joint Venture Agreement. Matud sa mga kontra sa mayor nga alkanse ang siyudad sa pagbahinay nga makadawat lang ang dakbayan og 10 porsiyento sa kitaon sa proyekto nga molungtad og 75 ka tuig.

Pareho nga dunay mga punto sila si Osmeña ug ang mga kaalyado sa Team Rama. Kon tinuod man nga barato ra ang pagbaligya ni Rama sa 42 ektaryang yuta sa SRP, angay kini nga ipakanselar, sama nga kon alkanse man ang siyudad sa kontrata pag-develop sa Kawit Island, dili kini maayong ipadayon.

Ang nakadaot lang kay ang Commission on Audit (COA) nagpabiling kiyugpos niining maong mga isyu, bisan og gipangayoan na sila og opinion sa mayor, aron unta ibutyag kon kinsa ang nagtug-an sa tinuod.