EDITORYAL - Nasuya lang ang Amerika
Ang Amerika maoy bugtong nasud nga nitabang sa Pilipinas sa panginahanglan niini og defense equipment. Duna usab silay Mutual Defense Treaty ug Enhanced Defense Cooperation Agreement.
Apan sagad sa defense equipment donasyon nga surplus nga di na nila gamiton apan may pakapin nga mga kondisyon ayha pa nila ihatag o ibaligya sa baratong presyo.
Dili sab tanang panginahanglan sa Pilipinas gihatag sa Amerika mao nga nangita kita og laing mga nasud nga maka-supply niini.
Ang Italy, France, Britain, Belgium, Turkey, Germany ug United Kingdom nakabaligya na og mga gamit militar dinhi. Napun-an kini sa South Korea, Canada, Indonesia, ug Israel.
Pulos ni sila kaalyado o may maayong diplomatikong relasyon sa Pilipinas ug Amerika. Apan kon sila papilion mas mopili sila sa US tungod sa ilang dagkong economic trade agreements nungka sa kong unsay ilang relasyon sa Pilipinas o kantidad sa gipalit nga military hardwares.
Hagbay rang nangandoy ang AFP og modernong mga gamit apan kuwang sa budget ug may kurapsyon.
Gipugngan sab sa Amerika ang suppliers pabaligyaan ang Pilipinas kay nahadlok silang dili na magsalig kanila ang mga Pilipino. Kon aduna pa lang dagkong trade agreements ang Pilipinas niining mga nasud sa arms dealers mahimo niining sundogon ang Singapore, Malaysia, Indonesia, Vietnam ug Thailand nga nakapalit og mga modernong gamit militar sa Uropa, Russia ug China.
Karon nipresentar ang Russia ug China pagtabang sa modernisasyon sa AFP pinaagi sa ‘soft loans’ aron makabaton kita og mga modernong gamit nga gipugngan sa US para sa Pilipinas.
Kaning duha adunay kaugalingong interes sa Pilipinas hinungdan nga di sila maimpluwensyahan sa Amerika.
Bisan magtagawtaw pa ang US sa Pilipinas kon makig-deal sa Russia ug China di kini angay ikabalaka kay mahadlok ang mga Amerikano nga masuod nato ang iyang mga karibal.
Ang kadagatan sa Pilipinas mahimong agianan pagsud-gawas sa pwersa sa Russia ug China padung sa Pasipiko nga giisip sa US nga ilang balwarte.
Arangkada
Ni Leo Lastimosa
Pinugsanay nga pag-atubang
Ang usa ka kasarangan nga kihante mamalihug ug motabang pa gani sa iyang abogado sa paghipos og mga ebidensiya ug pagtuon sa mga balaod ug susamang mga kaso nga makapalig-on sa gipasaka nilang kaso.
Apan kon anak sa presidente ang kihante, suguon lang niyang kapolisan.
Mao nang naduhig ko sa mga kasong sibil ug kriminal nga gipasaka ni kanhi Davao City Vice Mayor Paolo Duterte batok sa mortal niyang kaaway nga si Senador Antonio Trillanes IV.
Isip usa sa labing unang nasampolan sa bag-ong gahom sa Criminal Investigation and Detection Group (CIDG).
* * *
Niadtong Marso 1 ning tuiga, gipirmahan ni Presidente Rodrigo Duterte, ang amahan sa kihante, ang Republic Act 10973, nga niusab sa Local Government Code ug nihatag og gahom sa pagluwat og supina sa hepe sa Philippine National Police (PNP) ug sa hepe sa CIDG.
Bisan kinsa nga luwatan nila og supina di makabalibad. Ang kapakyas pagtuman sa subpoena ug subpoena duces tecum mahimong sukaranan sa pagpasaka og kaso nga indirect contempt ubos sa mga lagda sa hukmanan atubangan sa Regional Trial Court (RTC). Maong napugos ko og atubang sa CIDG. Kaduha na.
* * *
Sa unang supina, gisugo ko nila pag-adto sa CIDG-7 sud sa Kampo Sotero Cabahug nga mao say nahimutangan sa Cebu City Police Office niadtong Hulyo 27 karong tuiga uban sa kopya sa recording sa akong interview ni Trillanes sa Arangkada sa DYAB niadtong Septiyembre 8, 2017.
Nitunga ko sa gitakdang adlaw ug nipahibawo nila nga napapas na ang recording sa interview 10 ka buwan nang nilabay.
Apan giluwatan ko og ikaduhang supina ug gimandoan pagtahan gyud sa recording.
Nibalik ko sa CIDG -7 niadtong Biyernes ug nibalibad na sab. Gipahimo na ko nila og affidavit.
* * *
Nakasabot kong di kabalibad ang kadagkoan sa CIDG sa anak sa presidente.
Wa ko kahibawo kon ila na ba kong lung-an o luwatan na sab og ikatulo ug mas isog nang supina. Kapila man ko magbalik-balik og balibad una sila moundang pagpugos nako pag-atubang nila?
Ug unsa may garantiya nga di sakyan sa ubang mga kihante ang bag-ong gahom sa CIDG aron pagpanghasi sa mga sakop sa media ug ubang may atraso nila?
* * *
- Latest
