Paninglunon sa SSS

Hinumdoman nga sa dihang na-isyu ang bahin sa paghatag og P2,000 nga usbaw sa pension sa mga SSS retirees, ang main nga rason pagbalibad niini sa taga SSS mao nga kon kini ihatag, lagmit mabangkarota ang SSS.

Kini sa panahon pa ni kanhi Presidente Noynoy Aquino. Naabtan sa Duterte administration ug bisan sa kabalaka sa taga-SSS nahatag gyud ang gipangayo nga usbaw, bisan tuod og partial ra ang nahatag.

Hinumdoman usab nga si kanhi Rep. Neri Colmenares maoy mi-file sa HB 5482 niadtong Hunyo 9, 2015 nga nag-usbaw sa SSS pension. Napasar kini sa Lower House uban sa 211 vs. 0 vote, ug sa Senado: 15 vs. 1 vote. Sa ato pa, labaw pa’s overwhelming ang pagpasar niini sa Kongreso.

Gi-vetoe-han kini ni Noynoy kay mituo siya sa kabalaka sa taga-SSS nga mabangkarota ang SSS kon ihatag ang maong usbaw. Matud nila, magkinahanglan ang SSS ug P56 billion matag buwan kon i-grant ang P2,000 increase.

Wala motoo si Colmenares niini. Matud niya, imposible kaayong mabangkarota ang SSS tungod kay una sa tanan, tulobagon sa kagamhanan sa Pilipinas nga dili mahutdan og kwarta ang SSS, sumala sa 1997 SSS Charter nga nagkanayon:

“The government of the Republic of the Philippines accepts responsibility for the solvency of the SSS. The government shall regularly appropriate the necessary funds to augment SSS funds and benefits.”

Dugang niini, gihikyad ni Colmenares, kining mosunod nga mahimong tinubdan sa pundo sa SSS:

1) P328 billion nga collectibles. 2) Cutback exorbitant expenditures. 3) Gamiton ang mga idle assets/properties nga bili’g P17.956-B. 4) Iuli ang P71 million unauthorized allowances. 5) Kolektahon ang P8.168-B nga unremitted employer contributions. 6) Kolektahon ang P61.226-B nga ageing unpaid loans. Kadaghang kwarta ini! Kini nga mga figures sa 2016 pa.

Ari kita sa mga collectibles. Karon ang COA mimando sa SSS pagkolekta na sa P79-B nga wala mabayri nga utang. Sa atong gihikyad sa unahan, P61.122-B pa ang maong unpaid ageing loans.

Ang maong mga utang nanubra o ni-exceed sa gitugot sa SSS Charter by 61.65 percent o P30.111 billion. 

Karon, gumikan sa maong direktiba sa COA, ang SSS nagplano pag-tap sa third-party collectors gumikan sa kakulang sa ilang mga account officers. Karon pa?

Sumala sa atong giingon sa unahan, daghan kaayo’g tinubdan sa pundo ang SSS, kon magtinarong o mo-efficient lang sila sa ilang mga katungdanan. Ang gi-emphasize sa COA dinhi mao lang ang mga collectibles. Ang uban diay?