Unsay ikabalaka?

Seryoso ang pasangil ni Mayor Tomas Osmeña nga “politically motivated” ang mga hulga sa kinabuhi nga iyang nadawat.

Maayong ipa-imbestigar sa mayor ang iyang pangangkon aron dili siya madudahan nga nagtumotumo aron makakuha og atensiyon.

Ang pasangil sa mayor nga nakadawat siya og death threat pinaagi sa text message maayong iyang isumiter sa imbestigasyon aron mahibaw-an kun tinud-anay ba gyud siya nga adunay hulga.

Maayong isumiter sa mayor ang iyang text message sa National Telecommunications Commission (NTC) aron masuta kon tinud-anay ba gyud kini nga text message gikan sa laing tawo ug dili text message nga minugnamugna lamang.

Sayon ra kaayo ang pagpadala og text message sa akong kaugalingon aron ipatuo nga text message kini sa tawong nanghulga sa akong kinabuhi. Sayon ra usab ang pagpanugo o panuhol og laing tawo aron sa pag-text kanako og hulga.

Apan kon seryoso ang hulga sa kinabuhi sa mayor, dili kini angayang palabyon tungod kay kinabuhi ang nakataya niini. Dili siya angay mokompiyansa ug angay niya kining ipasusi.

Apan kon mo-conclude dayon siya nga politically motivated ang hulga, kay kuno gi-“misinform” si Pres. Duterte kalabot kaniya nga gilambigit sa drugas tungod sa iyang kasuod sa iyang bodyguard nga si SPO1 Adonis Dumpit, dili usab ko motuo niini.

Nasayod ang mayor nga dili daling mapatuyok ang ulo ni Duterte.

Nasayod kita nga ang presidente dili dali nga motuo og estorya-estorya lang. Kon aduna siyay desisyon, nag-agi kini og subsob nga “verification.”

Busa dili angay mahadlok ang mayor nga may dautang laraw ang presidente niya. Kay dili dali nga motuo ang presidente og “estorbot” kon estoryang botbot.

Gawas kon adunay kamatuoran ang mga estorya-estorya kalabot niya sama sa affidavit ni Jumbo Diaz nga nakadawat (kuno) ang mayor og P7 milyones gikan sa druglord nga si Jaguar Diaz; ang kalambigitan niya ni SPO1 Dumpit nga napatay sa drug operation didto sa Tagbilaran; ug ang surveillance ni PO3 Eugene Calumba sa Barangay Tejero nga miresulta sa pagpatay ning polis human pusila sa bodyguard ni kanhi kapitan Jessielou Cadungog nga suod sa mayor, ug si Cadungog gipasangil sa kapolisan nga anaa sa drug watchlist. Malisang gyud siya kay motinuod man ang presidente paggukod sa mga narco-politicians.

Pero hangtod limpyo ang konsensiya sa mayor, wala gyud siyay angayang kabalak-an. Kay ang presidente dili mailad sa sulti-sulti lang.

Kon ipakita sa mayor nga balisa kaayo siya pinaagi sa pagpamasangil na lang ni bisan kinsa (Heneral Debold Sinas, Koronel Royina Garma, kalihim Mike Dino), maisip na hinuon sa mga tawo nga aduna siyay gitaguang kamatuoran.

Padayon lang sa pagserbisyo sa hilom, kun wala kitay gitagoan sa atong pagkatawo.