Husto si Tommy

Angay gyud nga tumanon ni Cebu City Police Office (CCPO) director Royina Garma ang kamandoan ni Mayor Tomas Osmeña nga padestinohan og mga sakop sa Special Weapon and Tactics (SWAT) ang mga sakyanan sa Mobile Patrol Group.

Angay’ng hinumdoman ni Garma nga ang mayor gi-deputized sa National Police Commission (Napolcom) aron sa pagsuperbisar ug pagmando sa kapolisan, pinaagi sa iyang mga hepe, alang sa pagpalambo sa kampanya pagpatunhay sa kalinaw.

Ang gahom sa mayor sa pagsuperbisar sa kapolisan gilatid kini sa Section 62 sa Republic Act 8551, kon the New Police Act of 1998. Mao kini ang nag-usab sa PNP Law, ang Republic Act 6975, nga naaprobahan kaniadtong 1990.

Si Garma isip opisyal sa kapolisan, nasayod gyud niining mao nga balaod.

“The term operational supervision and control shall mean the power to direct, superintend, and oversee the day-to-day functions of police investigation of crime, crime prevention activities, and traffic control.”

Ang dugang gahom nga gihatag sa mga mayor mao ang “power to direct the employment and deployment of units, or elements of the PNP, through the station commander, to ensure public safety and effective maintenance of peace and order within the locality.”

Sa ato pa, ang giingon diha nga “employment” nagpasabot kini nga mao ang paggamit sa kapolisan aron kapanalipdan ang kinabuhi ug kabtangan sa katawhan ug ang pagdakop sa mga kriminal nga makahimo og salaod.

Ang “deployment” nagpasabot nga mao ang “orderly and organized physical movement of elements or units of the PNP within his area.”

Busa, si Garma dili makabalibad sa kamandoan ni Osmeña, kay ang pagpadestino sa mayor og tag duha ka SWAT personnel sa matag sakyanan sa mobile patrol, gitumong man kini nga molambo ang peace and order.

Ubos hinoon sa balaod, ang mga mayor mahimong matangtangan sa ilang pagka Napolcom deputy, kon masuta nga siya nakigkunsabo sa mga kriminal ug miabuso sa gahum nga gitugyan kaniya, ingon man gigamit ang mga polis sa mga kabuang.

* * *

Ang pangutana, unsa man ang mahitabo kon ang kamandoan sa mayor dili tumanon ni Garma? Buyno, sa akong nabasa sa balaod, si Garma mahimong mag-atubang og kaso pananglit dili niya tumanon ang kamandoan ni Osmeña.

Ubos sa Titile 4, Section 52 sa Republic Act 8551 (Disciplinary Mechanism), ang mayor gihatagan sa balaod nga makapahamtang og silot sa mga polis nga nadestino ubos sa iyang teritoryo. Kon dili tumanon ni Garma ang kamandoan ni Osmeña, maisip kini nga insurdination.

Ang mayor gihatagan og pagsuspenso sa mga polis ug pag-withhold sa ilang mga sweldo ug ubang benepisyo, basta dili lang molapas sa 30 ka adlaw.