P6.8 bilyones nga shabu nakalusot

Mokabat sa 500 ka kilo nga shabu nga mobalor og 6.8 bilyones ka pesos ang nadiskobrihan nga nakalusot sa Manila International Container Terminal nga gibantayan sa Bureau of Customs kini bisan pa man sa gipalig-on nga kampanya sa Philippine Drug Enforcement Agency (PDEA) ug kapolisan. Ang shabu gituohan nga nabaligya na sa kadalanan.

Ang nagkantidad og bilyon nga shabu nga nakalusot gituohan nga iya kini sa Golden Triangle Drug rings nga naglihok sa utlanan sa mga nasud sa Laos, Myanmar ug Thailand.

Ang shabu nga miabot sa kaulohan giingon sa PDEA nga gikan kini sa Taiwan ug gipaagi o gipalusot sa Malaysia nga maoy nagsilbing transhipment sa ginadili nga drugas nga miabot sa Manila niadtong hinapos nga bahin sa Hunyo ug gisulod sa warehouse nga giabangan sa kantidad nga tag P150,000  matag buwan sulod sa usa ka tuig sugod niadtong Hulyo 13 ning tuiga.

Tungod sa nakalusot nga toneladang shabu, gimando ni Justice Secretary Menardo Guevarra kang NBI director Dante Gierran ang pagporma og team sa mga ahente nga mag-imbestigar kon giunsa sa paglusot sa shabu nga gikataho nga gisulod sa mga nasakmit nga magnetic lifters nga malampuson nga nakalusot ug nakasulod sa usa ka warehouse didto sa General Mariano Alvarez sa Cavite.

Ang problema lang kay sa gipahigayon nga imbestigasyon sa ubos bay balauranan giingon sa Bureau of Customs nga nagnegatibo sa shabu ang eksaminasyon sa mga ebidensiya nga nakuha sa magnetic lifters. Apan gibarogan sa PDEA nga adunay sulod nga shabu ang mga magnetic lifters basi sa simhot sa K-9 dog.

Makasabot ko sa Bureau of Customs nga maningkamot sa pagpasabot nga negatibo sa shabu ang mga ebidensiya tungod kay tamparos sa ilang nawong ang paglusot sa shabu sa ilang teritoryo. Pero kining gihimo sa Bureau of Customs makapalig-on sa mga pagduda nga duna silay mga tawo nga nakigkonsabo sa sindikato sa gidili nga drugas