Unom ka pangutana
Kon ganahan silang Police Regional Office (PRO) 7 Chief Debold Sinas ug ubang mga imbestigador sa kapolisan ug sa National Bureau of Investigation (NBI) nga mahibawo unsay tinuod nga nahitabo nilang Philippine Drug Enforcement Agency (PDEA) 7 Agent Von Rian Tecson ug sa sakop sa Regional Special Operations Group (RSOG) nga si SPO1 Roderick Balili, angay nilang tubagon o hipuson ang mga dokumento ug mga ebidensiya nga makatubag sa mosunod nga mga pangutana nga gitampo sa usa ka suki nga tigpaminaw sa Arangkada sa DYAB Abante Pa, Bisaya!:
* * *
1. Kinsa man ang rehistradong tag-iya sa puwa nga Pajero nga may plaka nga GHD 753 nga maoy nibabag sa wa pay plaka nga itom nga Ford Ranger ni Tecson atol sa pagpamanhig sa Barangay Perrelos sa Carcar City niadtong udtong tutok sa Agosto 8 (mahimo hinuon nga di na makatabang kay nakaplagan sa Land Transportation Office nga peke ang plaka)?;
2. Unsa may nakit-an sa dashcam sa sakyanan ni Tecson nga naa sa sud sa SD memory card nga gitakdang itunol sa iyang maguwang nga si SPO1 Von Tecson ngadto sa mga imbestigador sa NBI?;
* * *
1. Kanus-a man ipagawas ang CCTV sa South General Hospital nga nabantang ang puwa nga Pajero (di puti nga Toyota Altis) ug mga sakay nga nagdayong sa samaran nilang pasyente paingon sa emergency room (ER), nipahibawo sa mga doktor ug nurses nga ang pasyente aksidenteng naigo sa firing range ug namiya nga wa mohatag sa ilang mga ngan?;
2. Kanus-a man ipagawas ang CCTV sa South General Hospital nga nagpakita sa nagpaila nga polis nga niapura sa mga doktor ug nurses pag-atiman sa nagkadugo nga pasyente nga giila niya ug gilista sa nurses nga si SPO1 Roderick Balili?;
* * *
1. Kanus-a man ipagawas ang CCTV sa South General Hospital nga nagpakita nga ang pasyente gikarga sa ambulansiya sa Naga City inay sa ambulansiya sa ospital kuyog sa nagpailang polis ug mga kawani sa ER padung sa Cebu Doctors Hospital sa Cebu City?; ug
2. Kanus-a man ipagawas ang CCTV sa Cebu Doctors Hospital nga nagpakita sa pag-abot sa ambulansiya sa Naga City dayon nang tikyop sa kangitngit nga nagda sa nagkadugo nga pasyente ug sa tanang kuyog?
* * *
- Latest
