Palma tuburan sa gugma ug kalooy

Niadtong Hulyo 29, gilubong si Tiya Petra Alfafara Valencia, usa sa mga suod higala ni kanhi gobernador ug karon Talisay City Mayor Eduardo “Eddiegul’ R. Gullas,  didto sa pribado nilang sementeryo sa Carcar City.

Panahon pa sa pagkagobernador ni Mayor Eddie, diehard supporter na si Tiya Petra, igsuon sa inahan sa akong misis, Mama Juana Alfafara Aldueso. Busa, daghang proyekto ang paspas nga nahuman sa Carcar ubos sa panabang ni Eddiegul, kinsa niadtong mga higayona, wala gyuy pilde-pilde sa eleksiyon.

Gani, gidasig man ni Eddiegul si Tiya Petra nga palansaron pagka mayor sa Carcar, pero hugot nga mibalibad ang tinamod ug ligdong nga prinsipal sa pampublikong tunghaan sa Carcar.

Kausa ra makatilaw og pilde si Eddiegul, diin gamay ray labaw ang kontra. Hinuon, nahibalik ra dayon siya sa puwesto dihang nakomparar sa katawhan sa Talisay City, kinsa nilang duha nga karibal niya sa politika ang makahatag og mas maayong kalamboan sa ilang lugar.

Usa ka solemneng requiem mass ang gipahigayon mismo didto sa nahisgotang pribadong sementeryo, diin si Archbishop Jose Palma sa Archdiocese of Cebu maoy nangulo uban sa kaparian sa Carcar City Parish Church sa pagmisa sulod sa simple apan maanindot nga kapilya.

Human sa requiem mass ug pagsulod sa lungon ni Tiya Petra didto sa panteyon nga mao nay permanente niyang pahulayanan, nahibulong ko, kay imbes mobiya dayon si Archbishop Palma, mi-estar pa kini’g dugay aron ma-accommodate ang pamarayeg sa tanang nanambong, kinsa gustong makig-photo shoot with the Archbishop, diin nagpulipuli la’g kidlap ang mga camera nga mihawok sa balaang alagad sa Diyos.

Didto sa kinakaraanang balay sa Tisa, Carcar City,  nilang Tiya Petra, gipasaka ang archbishop. Nakita ko ang karaan na kaayong Pajero nga iyang gisakyan. Sama ni Pope Francis, gipuy-an ni Archbishop Palma ang kakabos.

Ug misamot nga daw  gikumot akong dughan dihang paghatag sa sobre nga gisudlan sa iyang stipend, iyang gipangutana ang naghatag: “Unya, wala ni ninyo kinahanglana?”

“Wala, Archbishop, uy! Imo gyud na!” Tubag sa midunol. Ug diha pa gisulod ni Archbishop ang sobre sa iyang bulsa.

Pagka dalaygong kinaiya! Kinaiya nga tuburan sa  dakong gugma ug kalooy.