EDITORYAL - NDRRMC hulipan og DDM?

Adunay mga tawo nga nangusog aron kuno mag-establisar og dugang departamento nga motutok gyud kabahin sa mga pagpangandam sa mga katalagman ug emerhensiya. Kini mao ang Department of Disaster Management o unsa pa kahang pangalana ang ilang nahuna-hunaan. Ang mga proponent niini nagtinguha nga makabaton kuno ang nasud og departamento kalakip niini ang legal personality sama sa ubang mga department sama sa DOH, DepEd, DPWH, DSWD ug uban pa.

Kon duna na unyay DDM kinahanglang mokuha og dugang secretary, undersecretaries, assistant secretaries, directors, staff, mga sakyanan, mga rescuers, disaster managers ug uban pa. Kinahanglan usab silang adunay kaugalingong mga regional offices sa tibuok nasud.

Ang kasamtangang National Disaster Risk Reduction and Management Council (NDRRMC) naporma pinaagi sa Republic Act 10121 (Philippine Disaster Reduction and Management Act).  Ang NDRRMC maoy mangulo sa tanang mga gimbuhaton sa preparasyon, relief operations ug rehabilitasyon kon may katalagman dinhi sa nasud.

Kon adunay katalagman sama sa bagyo, gihatagan sila og gahom nga tigumon ug gamiton ang pwersa ubos sa Office of Civil Defense sama sa DILG diin sakop ang PNP, BFP, LGUs ug mga tanod;  DND diin sakop ang AFP;  DOH;  DPWH; DSWD ug uban pa aron matabangan dayon ang katawhan gikan sa epekto sa katalagman. Unsa pa may pangitaon ana? Kompleto naman ang mga ahensya sa gobiyerno nga makaaksyon kon gikinahanglan.

Kaning mga ahensyaha naa nay mga tawo may kapabilidad sa civil defense operations ug aduna usab silay mga gamit kon gikinahanglan.

Ang kinahanglan karon sa NDRRMC mao nga palamboon kini sama sa paghatag og dugang pundo.

Kining pundo ipalit og mga specialized equipment ug gastos alang sa dugang disaster related trainings sa mga polis, sundalo, bombero, LGUs, mga tanod ug uban pa.

Kon magtukod og DDM, wa kini pulos ug magdoble lang hinuon sa gastos sa katawhan kay kon buot hunahunaon kompleto naman halos ang NDRRMC.

Kaning DDM possible pang masudlan og kurapsyon.