EDITORYAL - Shabu gikan sa abroad

Samtang gipangusgan ang kampanya batok sa ilegal nga drugas, gipahugtan usab sa mga sindikato ang mga pamaagi aron kini makalusot dinhi sa Pilipinas gikan sa abroad.

Adunay na-intercept nga 500 ka kilong shabu nga gisud og magnetic lifters ang nasakmit sa Bureau of Customs ug Philippine Drug Enforcement Agency didto sa kaulohan. Milampos man tuod sila pagsakmit niini, apan may mas daghan pang shabu diay nga nakalusot sa susamang paagi nga karon gituohan sa PDEA napakatap na sa kadalanan.

Na-detect didto na sa bodega nga gidad-an niini sa General Mariano Alvarez sa Cavite apan basiyo na lang mga magnetic lifters nga adunay lama sa shabu maoy naabtan sa PDEA.

Moabot og P6.8 Bilyones ang kantidad sa maong shabu nga gituohang gikan sa Golden Triangle drug syndicate nga nagbase taliwala sa mga utlanan sa Thailand, Myanmar ug Cambodia nga gibiyahe padung sa Taiwan dayon sa Malaysia ayha pa gidala dinhi sa Pilipinas sumala pa sa kadagkoan sa PDEA.

Sa miaging tuig, adunay susama kadako nga shipment gihapon sa shabu ang giingong nasakmit sa BOC apan ang pipila ka bahin niini ang nakalusot gihapon ug gani gihimoan pa kadto og inquiry sa Senado ug naduhig ang pangalan ni kanhi Davao City Vice Mayor Paolo Duterte , kanhi BOC Commissioner Nicanor Faeldon ug uban pa.

Dugoon ug makalilisang ang gubat sa law enforcement units batok sa ilegal nga drugas diha sa kadalanan kay dunay mga kinabuhing nakalas sa ilang habig.  Gawas pa daghan na usab kanila ang nasaag sa dalan ug nahaylo sa mga sindikato ug karon uwahi na ang pagmahay.

Mao ni nga di na ikatingala nga bisan sa subsob nga kampanya daghan man gihapong masakmit nga shabu.

Mag-unsa na lang man kining mga law enforcement sa ubos kon ang magbalantay sa pultahan sa nasud nagmika man sa ilang trabaho?