Accidental firing?

Daghan ang nagtuo nga ang polis nga may samad pinusilan ug unang gidala sa South General Hospital sa City of Naga, Cebu kaniadtong Miyerkules sa hapon human nga gibanhigan ang PDEA agent nga si Von Rian Tecson, kabahin gyud sa grupo sa mi-ambush sa biktima.

Apan lahi ang pangangkon sa kadagkoan sa kapolisan kay matud ni Central Visayas Police Regional Office-7 Director Debold Sinas nga si SPO1 Roderick Balili aksidente lang nga nabuthan sa iyang armas samtang siya ug kaubang polis nagpahigayon og surveillance didto sa Pinamungajan.

Daghan gyud hinoon sa katawhan ang nakapahiyom niining gipahibalo sa kadagkoan sa kapolisan, apan gawas kon adunay makapakita og ebidensya nga dili kini tinuod, ato na lang nga tuohan. Ang nindot sa kapolisan, klaruhon gyud nila pag-ayo aron dili maglibog ang katawhan.

Pagka karon, dunay report nga namatay ang polis, ug may miingon sab nga buhi pa.

Apan matud sa among reporter sa Banat News nga si Camille Pateres, si SPO1 Balili buhi pa ug anaa kini na-admit sa Cebu Doctor’s Hospital.

Kaniadtong Huwebes, ang mga reporter naglibog kay gipanghimakak sa kapolisan nga may polis nga napusilan ug nadala sa tambalanan.

Nagtuo na hinoon ang publiko nga dugay kaayong nakahimo og scenario ang kapolisan kon unsaon nila pagpalutaw ang hitabo nga nakapaangol kang SPO1 Balili.

Ang isyu man gud nga kon may polis nga nasamdan ug napusilan kaniadtong Miyerkules sa hapon, kadudahan man gyud nga kabahin kini sa mibanhig ni PDEA Agent Tecson didto sa Perelos, Carcar.

Apan giingon nga samtang nagsakay si SPO1 Balili og kotse sa ilang pag-surveillance didto sa Pinamungajan, ang iyang armas gitunol sa kauban niya nga maoy nag-drive. Pagdawat ni SPO1 Balili, mibuto kuno ang armas. Pastilan.

Apan sagdi lang, matud sa panultihon, walay aso nga makumkom.

Sa ato pa, kon dili man gani tinuod nga si SPO1 Balili igo lang naaksidente, moabot ra ang higayon nga molutaw ang kamatuoran.

* * *

Ako hinoon mitoo gyud nga daghan sa mga nahitabong pagpamatay dinhi sa nasud, binuhatan ra sa mga tropa sa kagamhanan nga gitahasan paglikidar sa mga badlungon sa katilingban.

Kadtong mga nagsunod niining akong lindog, nakatimaan tingali mo nga kaniadto ko ra kini nga gihisgotan.

Ang mga target nga patyonon, mao kadtong mga tawo nga nalambigit sa ilegal nga drugas.

Dili nato ikalimod nga nasuko gyud si Presidente Duterte sa mga tigpayuhot og drugas, ilabi na kon tinugyanan sa balaod nga nakigkumboya sa mga drug lords ug pushers.

Ang akong awhag mao nga bisan og kita wala malambigit sa drugas, angay gihapon nga magbantay.