EDITORYAL - Modernong Philippine Navy

Sa labing unang higayon , bisan sa mga pasangil nga kurapsyon, politika,  burokrasya ug uban pa, nakabaton na gyud og maisip nga “ngipon” ang Philippine Navy (PN) human nga malampuson nilang nasuwayan ang labing una niining missile gunboat.

Ang Philippine Navy hagbay rang nangandoy nga makabaton og susamang armas kay nabiyaan na sila sa mga silingang navies.

Ang PN nakapalit og Israeli-made Spike ER (Extended Range) missile nga ilang gimuntar sa Multi-Purpose Assault Craft (MPAC) ug gisuwayan nila og pabuto atol sa usa ka naval drill sa kadagatan sa Limay, Bataan.

Ang MPAC acquisition project sa PN nasugdan panahon pa sa administrasyon ni Pres. Aquino ubos sa Revised AFP Modernization Program, Horizon1 niadto pang tuig 2014 apan karon lang hingpit nga natuman ang pagbutang og missile system niini tungod sa kadaghang giagiang mga kakulian pagpalit niini gikan sa Israel.

Sa modernong pakiggubat karon nga naglambigit na sa mga computers, dili na magsilbi ang kanyon ug riple aron makabentaha sa kaaway. Ang pagbaton og missile system nga makahatag og kadaot sa mga kaaway dako kaayo og kalainan.

Tungod sa maong modernong missile-armed gunboats mausab na og gamay ang pagtan-aw sa ubang mga nasud sa PN.  Sama sab sa nahitabo sa Philippine Air Force nga kaniadto gibansagang “pulos lang Air way Force” tungod kay wa kini matawag nga fighter jets human giretiro ang kataposan niining mga fighter jets niadtong tuig 2005.

Dihang nangabot ang gipamalit nga FA-50PH jets sa panahon ni PNoy, napapas na ang maong bugalbugal ilabi na nga napamatud-ang epektibo kini dihang gigamit kini sa Marawi siege sa miaging tuig 2017.

Apan layo pa kaayo ang apason sa DND-AFP aron makasikit sa mga nakauna nang mga silingang nasud pagbaton og modernong armadong kusog.

Bisan pa man niini, importante nga ang ibutang nga mangulo sa AFP kadtong nakahibalo kon unsay gikinahanglan nga dili mausik ang nihit nga pundo sa gobiyerno.