Unsa gyud ang tinuod nga rason?

Unsa diay? Ang mga sakop sa SWAT sa Cebu City Police Office (CCPO) dili diay moresponde sa mga alarma gawas lang kon may “go signal” sa kadagkoan sa kapolisan?

Matud ni CCPO Director Royina Garma nga “elite troop” ang SWAT ug dili kini maoy “first responder” kon adunay mahitabo nga krimen.

Dili na sab hinoon ko mosakay sa baruganan ni (Colonel) Garma bahin niini.

Sa ato pa, mag-standby lang ang SWAT diha sa ilang kampo? Nganong dili man nato tugotan nga moresponde?

Kon moresponde ang SWAT, posible pa nga makatabang sila nga madakpan dayon ang mga kriminal.

Wala gyud hinuon isulti ni Mayor Tomas Osmeña, apan nakapahibulong kini sa mayor kon nganong supak man si Garma nga moapil ang SWAT sa pagresponde kon may mga pagpamusil, pagpanulis ug ubang alarma?

Kaniadto, ang ubang sakop sa SWAT makita man gani nato nga magsauy-saoy sa mga karsada nga magsakay og motorsiklo aron sila maoy mag-una kon may alarma.

Kadto maoy nindot kaayo nga pamaagi, ug unta ipadayon kini ni Colonel Garma.

Kon padayon nga did-an ang SWAT pagresponde dayon sa mga alarma, sama sa pagpamusil, makapaduda kini nga gituyo aron nga pananglit adunay pamusilon, dili peligro nga masakpan ang mga kriminal, kini ilabi na nga giingong mga polis ang ubang “killers.”

Unta, matimbangtimbang pag-ayo ni Garma kining mao nga punto.

 * * *

Angay tingali nga si Garma, makigsulti gyud ni Osmeña, kay aron mahatagan og katin-awan kining mga isyu nga gustong ipalutaw sa mayor.

Duna kuno’y kwestyonableng polis nga gidala si Garma, gikan sa Criminal Investigation and Detection Group (CIDG), ngadto sa Cebu City Police Office diha nga miasumier na siya pagka city director.

Matud sa mayor nga kining maong polis anaa kini sa iyang listahan.

Kon may listahan kuno ang kapolisan sa mga nalambigit og binuang, siya may kaugalingon usab siya nga listahan ug naapil kining maong polis.

Wala man gyud hinoon giklaro ni Osmeña kon kinsa kining maong polis, ug ang iyang binuang, apan mihatag ang mayor og ideya sa mga reporters.

Kini kunong maong polis “romantically involved” sa usa ka kapitan sa barangay.

Ambot kinsa ni, kay wala gihapon ko’y ideya kon kinsa ang maong polis. Daghan kaayong mga isyu nga angay’ng hisgotan nila ni Garma ug ni Osmeña.

Angay’ng hinumdoman ni Garma nga isip mayor, si Osmeña gihatagan og “operational control” sa kapolisan isip Napolcom deputy.