Pildi ang president

Nagpatabang sa presidente sa nasud si Mabolo Barangay Kapitan Prisca Nina Mabatid, kandidato sa pagka presidente sa Association of Barangay Council (ABC) sa Dakbayan sa Sugbo tungod sa pagpanghilabot ug pag-impluwensya ni Mayor Tomas Osmeña sa mga kapitan aron mobotar kini pabor sa iyang kandidato nga si Barangay Kasambagan Kapitan Franklin Ong.

Mas maayo pa nga mag move on na lang si Mabatid ug atimanon ang panginahanglan sa iyang katawhan sa Mabolo kaysa maglangaylangay ug magkapoy sa iyang reklamo nga way hinungdan.

Gawas pa, daghan kaayo og problema ang presidente nga mas unahon niini sa pag-atiman kay sa reklamo ni Mabatid.

Mas maayong angkonon na lang sa kapitan ang iyang kapildihan ni Kapitan Franklin Ong. Mas maayong angkonon na lang usab ni Mabatid nga nabiktima siya sa hambog sa mga nagpadagan kaniya sa pagka presidente sa ABC.

Ang mga nagpaluyo gud ni Mabatid nanghambog nga gisuportahan sa opisina sa presidente ang kandidatora sa kapitana apan wala kini makita sa pag- abot sa piniliay sa ABC niadtong Lunes.

Kay ang mga nagpaluyo ni Mabatid nanghambog nga gisuportahan sa presidente ang iyang kandidatora ug ang kandidatora ni Ong gipaluyohan ni Mayor Tomas Osmeña maingon nato nga ang piniliay sa ABC kombati kini tali sa opisina sa Presidente batok sa opisina sa Mayor.

Resulta pildi ang opisina sa Presidente. Tungod sa resulta daw kantalita ang katawa ni Mayor Tomas Osmeña nga miingon nga dakong kapildihan sa opisina sa Presidente ang pagkapildi ni Mabatid.

Sa pagkatinuod kon gisuportahan pa ni Presidente Rodrigo Roa Duterte ang kandidatora ni Mabatid dili gayud kini mapildi ug walay laptop ug kuwarta ni Ong ang makapildi niya. Apan wala! Hambog ra ang misuporta niya maong napildi siya.