Checkpoint pa more

Kinahanglang hugtan pa gyud pag-ayo sa kapolisan ang pagpahigayon og checkpoint operations aron pagsita sa mga tawo nga magsakay og motorsiklo nga maoy responsable sa mga pagpamatay sa lainlaing dapit sa Metro Cebu.

Kana kon wala may kalambigitan ang kapolisan niining pagpangtipi sa mga tawo nga gidudahang nalambigit sa ilegal nga drugas.

Pwerteng kurata nako pagkasayod nga gipusil ug gipatay ang kanhi sakop sa media, nga karon nahimo na nga ahente sa Philippine Drug Enforcement Agency (PDEA).

Nagmaneho sa iyang kotse si Baby “Earl” Rallos didto sa Villalon Drive duol na sa eskina Escario Street kaniadtong Biyernes sa hapon diha nga gisakdapan sa duha ka tawo nga nagsakay og motorsiklo.

Ang nag-angkas sa motorsiklo, mipusil makaduha ka higayon tumong unta sa manobela, apan kay nagdagan man ang kotse, ang bala mitama sa likud nga bahin ni Rallos.

Abtik kaayong nakadapa si Rallos ug gibuksan ang pikas pultahan sa kotse (passenger’s side) ug milusot siya aron unta makaikyas gikan sa kamatayon.

Apan giingon nga nakalingi ang nagtira kaniya, nga didto na unta sa unahan, ug kay nakita nga buhi pa si Rallos, gibalikan kini ug giusban sa pagpusil hinungdan nga namatay ang biktima.

Nasabtan nako nga kon igo pa lang unta nga mihapa sa lingkoranan si Rallos, ug wala siya mogawas sa kotse, dili siya mamatay kay moderitso na man pagsibat ang namusil kaniya sa pagtuo nga siya patay na.

Ang nakapahibulong kanako kon ngano nga wala makagamit si Rallos sa iyang armas aron pagpusil sa mga nangatake kaniya. Tingali, wala gayud siya magdahom nga dunay moatake kaniya samtang siya wala magbantay.

* * *

Tambag nako sa mga polis ug ubang mga tigpatuman sa balaod, apil na ang ubang tawo nga posibleng may nasuko kanila, kon pistola ang inyong armas, i-chamber load daan ang inyong mga pusil aron nga kon may mangatake kaninyo, sa usa lang ka paggunit, makabawos dayon mo.

Alkanse na kaayo kon pananglit, atakehon na kamo ug diha pa nga higayona nga i-chamber load ninyo ang inyong mga pistola. Hinoon, kon revolver ang inyong armas, mahimo ra nga dili na lang bingaton daan ang firing pin kay dali ra man kini pabuthon.

Karong panahona, dili na gyud bastabasta ang sitwasyon. Kinahanglan nga maantigo kamo nga mohimo og mga counter-surveillance sa mga tawo nga posibleng nagpaniid lang kaninyo ug posible nga mokalit lang pagpangatake kon wala kamo magbantay.

Usa pa, ayaw gihapon kamo pagkumpiyansa bisan og anaa na kamo sa duol sa inyong pinuy-anan kay posible nga anha diha mag-atang ang mopatay kaninyo. Bisan gani sa inyong panimalay, ayaw pagkumpiyansa.