Langay na, iwit pa
Gisalikway sa Bol-anon nga Socioeconomic Secretary, Ernesto Pernia, ang mga pasangil nga luya ug mingaw ang pagpatuman sa higanteng mga proyekto ubos sa “Build, Build, Build” program ni Presidente Rodrigo Duterte.
Matud ni Pernia nga sukwahi sa pangangkon sa mga ekonomista, mas paspas ang pagpatuman sa mga proyekto karon kay sa nangaging mga pamunoan.
Niangkon hinuon si Pernia nga sa 75 ka flagship priority projects, 43 ra ang ilang napatuman sa unang duha ka tuig sa pamunoan.
Sa ato pa, dunay 32 ka proyekto nga gitumbok nila nga dinalian ug busa nagahinan na og kuwarta, apan hangtud karon wa pa masugdi og patuman.
* * *
Niangkon sab si Pernia nga sa 43 ka proyekto nga nasugdan na og patuman, unom pa ang aktuwal nga gitrabaho. Ang nahibiling 37 ka proyekto igo pa nga nahimoan og budgeting, financing, detailed design, design planning ug procurement.
Nga niinsister si Pernia kabahin na sa implementasyon sa mga proyekto kining makuti nga proseso sa pagpangandam.
Nipasalig siya nga magsugod na sa pagpanguhong ang higanteng cranes ug heavy equipment sa nagkalainlaing bahin sa nasud dayong tapus karong tuiga.
* * *
Gisukwahi hinuon ang pasalig ni Pernia sa aktuwal nga nahitabo sa pagpatuman sa mga proyekto sa niaging tuig:
Ang Department of Public Works and Highways (DPWH) napakyas paggasto og P73.4 bilyones nga balor sa mga proyekto, sama sa kadalanan ug school buildings nga nalangay, nasuspenso o nakanselar; ug
Ang Department of Transportation (DOTr) napakyas sab sa paggasto og P38.4 bilyones, nga naglakip sa unang tuig sa pagpatuman sa hagbay rang naaprobahan nga P53 bilyones nga Bus Rapid Transit (BRT) projects sa Sugbo ug Metro Manila.
* * *
Nakapasamot sa eskandalo sa kapakyas sa pamunoang Duterte paggasto sa gigahin nang binilyon ka pesos sa mga proyekto tungod sa ilang pagpamugos pagpahamtang og dugang buhis pinaagi sa Tax Reform for Acceleration and Inclusion (TRAIN) Law.
Kon wa kagasto sa daang pundo, unsa may garantiya nga magasto na ang bag-ong mga buhis?
Laing makahasol nga kasayuran gikan ni Pernia: Sa Philippine Investment Plan sa 2017 ngadto sa 2022, nakadawat lang ang Central Visayas og 6.28%, ang ikaduhang labing ubos sa tanang rehiyon sa tibuok nasud.
* * *
- Latest
