Madayon na ang eleksiyon

Sa hilom nalipay ko nga natangtang sa pwesto si kanhi House Speaker Pantaleon Alvarez. Ang rason tungod kay wala ko makagusto nga ipamugos gyud niya nga walay pagahimoong eleksiyon karong sunod tuig.

Sigurado ra ba gyud nga kadaghanan sa mga kongresista pabor nga walay eleksiyon kay aron nga dili sila makagasto. Ang tinuod, makagasto man gyud ang mga kongresista ug mga senador kon mag-eleksiyon.

Si Alvarez maoy nagpalutaw sa No-Election campaign. Tan-awa nga nawagtang na siya sa gamhanan niyang lingkoranan, dili ba wala na usab ang isyu sa No-El?

Ang mga kugihan nga mga politiko dili mahadlok og eleksiyon tungod kay samtang gasto man gyud tinuod ang piniliay, apan duna may mohatag kanila og tampo.

Ang angay’ng mahadlok sa eleksiyon kadtong mga politiko nga nakamatikud na nga mapilde sila tungod kay wala silay maayong serbisyo sa katawhan, ug ang ilang gipasuwabe mao ra ang kaugalingong interes.

* * *

Nakabasa ko sa suwat ni Jose Arcillas nga gipadala niya dinhi sa Banat News, ug gipublikar pa man gani sa laing mantalaan, pinaagi sa higala nako nga maglilindog.

Husto baya ang mga punto ni Arcillas nga angay’ng butangan gyud sa kadagkoan sa Land Transportation Office (LTO) og license card printing machine ang ilang satellite office sa Robinsons Fuente.

Nakabantay diay si Arcillas nga samtang paspas tuod kaayo ang pag-isyu og lisensya diha sa LTO-satellite office sa Robinsons, apan dili kini makaisyu og plastic drivers license.

Ngano bitaw nga ang machine, o ekipo sa LTO nga makaimprinta og plastic driver’s license, tua man gibutang sa SM Seaside? Para nako, nindot unta kaayo nga adto lang kini ibutang sa Robinsons Fuente.

Ang mahitabo karon mao nga kadtong molukat og lisensya sa LTO satellite office diha sa Robinsons Fuente, awhagon lang nga paadtuon sa SM Seaside.

Apan inig-adto didto, hatagan ka og petsa nga dugay pa kaayo aron ka pabalikon ug adto pa nimo makuha ang imong plastic driver’s license. Husto si Arcillas, nganong dili man lang kini ibutang diha sa Robinsons?

* * *

May mitug-an nako kagahapon nga dunay traffic enforcer sa CITOM nga napositibo sa drug test kaniadtong Mayo 12, apan wala gitaktak sa serbisyo. Matud pa nga giduphan kini og konsehal aron dili mataktak.

Pagkadawat nako sa maong report, mitingkag ang akong dunggan. Gisusi dayon nako kang Garry Lao nga maoy hepe sa COSAP, apan matud pa nga ang maong ngalan nga gitug-an kanako, wala man maapil sa napositibo sa drug test.

Basta nga ayoha lang gyud ninyo kay aron dili kita masawayan sa katawhan nga may pinili ra diay sa taktakon.