Lapok
Gitug-an sa pipila ka kapitan nga kaalyado ni Mayor Tomas Osmeña nga gitanyagan sila ni Mabolo Barangay Captain Prisca Niña Mabatid og tag P200 mil ngadto sa P1 million aron siya botaran pagka presidente sa Association of Barangay Councils (ABC) kontra ni Kasambagan Barangay Captain Franklin Ong nga maoy ‘manok’ sa mayor.
Apan gibulgar usab sa mga kaalyado ni Kapitan Mabatid nga gisubornohan ni Kapitan Ong ang mga kapitan pinaagi sa pagsige og imbitar niini og kaon, dayon hatagan og tag P10 mil.
Gisaaran usab ni Ong ang mga kapitan nga dad-on og bakasyon sa Hong Kong inigdaog niini sa pagka presidente sa ABC.
Ang mga kapitan nga kaalyado sa mayor miingon nga ilang gibalibaran ang tanyag ni Kapitan Mabatid kay loyal sila nga sakop sa partido ni Mayor Tomas Osmeña.
Hugot nga gipanghimakak ni Kapitan Mabatid ang pasangil nga siya namalit ug naglaraw siyang mohimo og imbestigasyon kay nagtuo siya nga gitumong ra kini aron lang pagdaot kaniya.
Pagka suwerte sa mayor no, nga nakakuha og mga kaalyado nga kapitan nga dili mapalit ang loyalty niini og usa ka milyon ka pesos? Hinuon, dili bahin sa loyalty kining akong lindog, kon dili, bahin kini sa pasangil.
Kon ako ang kapitan, wa ko’y botaran sa duha ka kandidato sa pagka presidente sa ABC kay pulos sila hugaw ug lapokon.
Sa ilang pagnilabayay og lapok, diin sila pulos nangaigo, pulos pud sila nagkalapok, busa wa’y mapili nilang duha, ug kon kapitan pa ko, wa ko’y botaran sa duha.
Kon ang mga kapitan wala makauyon sa gihimo sa duha ka kandidato nga nagpatas-anay sa kantidad sa ilang haylo aron lang botaran sa pagka presidente sa ABC, mas maayo seguro nga magporma kamo og ikatulong grupo nga mahimong alternatibo sa mga nagkalapok na nga kandidato. Dili ba maayo?
- Latest